Ríkisstjórn Filippseyja hefur fyrirskipað móðurfélagi Facebook, Meta, að herða aðgerðir gegn falsfréttum sem eru sagðar valda ótta og skapa ringulreið. Á vef WSJ er til að mynda vitnað í villandi fréttir sem tengjast núverandi orkukrísu. Upplýsingatækni- og fjarskiptaráðuneyti Filippseyja sendi bréf til Mark Zuckerberg þann 10. apríl sl. þar sem fyrirtækið er krafið um að hefta dreifingu falsfrétta og varaði við því að áframhaldandi dreifing bryti gegn lögum landsins. „Á tímum þar sem hækkandi eldsneytisverð og verð á nauðsynjavörum eykur viðkvæmni almennings fyrir upplýsingum um efnahagslegt ástand og viðbrögð stjórnvalda, getur villandi efni ógnað almannareglu og trausti á efnahag og þjóðaröryggi,“ segir í bréfinu. Meta var gefið 48 klukkustundir til að staðfesta móttöku bréfsins og sjö daga til að leggja fram ítarlega aðgerðaráætlun.