Bilun í álveri Norðuráls í október olli því að framleiðslan skertist um tvo þriðju. OR vill fá greitt fyrir umsamda orku síðustu sex mánuði. Álverið ber fyrir sig Force Majeure aðstæður en Orkuveita Reykjavíkur (OR) hafnar því. Líkt og Viðskiptablaðið hefur greint frá mun málið fara fyrir gerðardóm. Þá stefnir einnig í að OR fari í dómsmál við Landsnet vegna greiðslna á flutningi raforku til Norðuráls. Fjallað er um þetta í nýbirtum ársreikningi Reykjavíkurborgar, sem og í ársreikningi Orkuveitu Reykjavíkur. Í skýringu við reikningana segir að óvissa sé um greiðsluskyldu ON Power, dótturfélags OR, gagnvart Landsneti vegna flutningssamnings. Byggir sú óvissa á áþekkum forsendum í Norðuráls-málinu. Sjá einnig OR í hart við Norðurál og Lands­net „ON Power hefur hingað til einungis greitt fyrir flutt orkumagn og mældan afltopp síðan rekstrarbilun Norðuráls átti sér stað,“ segir í skýringu við ársreikningana. „Mismunurinn á greiddum reikningum og þeim sem hafa verið innheimtir af Landsneti er um 1,4 milljón USD (171 milljón króna) fyrir árið 2025. Enn er beðið formlegra viðbragða frá Landsneti um afstöðu fyrirtækisins en þrátt fyrir það má gera ráð fyrir að málið fari í ágreining og að leysa þurfi það fyrir dómstólum. Í ljósi þessa hefur ON Power gjaldfært hluta af mismuninum, eða þriðjung hans, í rekstrarreikningi fyrir árið 2025.“ Stjórnendur OR tóku tillit til tímabundinna rekstrartruflana Norðuráls við mat á gangvirði innbyggðra afleiða í raforkusölusamningum, sem færðar eru á efnahagsreikning. Bókfært virði þessara afleiða nam 3,7 milljörðum króna í árslok 2025, samanborið við 683 milljónir króna í árslok 2024. Miklir hagsmunir í húfi Niðurstöður gerðardóms- og dómsmáls, sem nú eru í undirbúningi gætu haft veruleg áhrif á afkomu Orkuveitu Reykjavíkur og þar með samstæðu Reykjavíkurborgar. Verði Force Majeure-vörn Norðuráls samþykkt fellur niður veruleg krafa Orkuveitunnar á álverið; verði henni hafnað situr Norðurál uppi með kaupskyldu á raforku sem ekki er notuð á meðan viðgerð stendur yfir — viðgerð sem er talin í mánuðum, ekki vikum. Áhugavert er að stefnt sé að því að fara með deiluna við Norðurál fyrir gerðardóm í stað hefðbundinnar dómstólaleiðar. Samkvæmt heimildum Viðskiptablaðsins er ástæðan meðal annars sú að ef dómstólaleiðin er farin þá yrði ekki komist hjá því að veita upplýsingar um raforkuverðið. Nánar er fjallað um málið í Viðskiptablaðinu . Áskrifendur geta lesið fréttina heild hér .