Daði Már Kristó­fers­son fjár­mála- og efna­hags­ráðherra hefur skipað Arnald Sölva Kristjáns­son, lektor við hag­fræði­deild Háskóla Ís­lands, for­mann fjár­málaráðs. Arnaldur Sölvi hefur setið í fjár­málaráði frá febrúar 2023 og gegnt vara­for­mennsku í ráðinu. For­maður fjár­málaráðs er skipaður til fimm ára í senn af fjár­mála- og efna­hags­ráðherra að fenginni til­nefningu for­sætis­ráðherra. Sam­hliða skipuninni undir­rituðu Daði Már og Silja Bára Ómars­dóttir, rektor Háskóla Ís­lands, sam­komu­lag um um­gjörð starfsins. Sam­kvæmt því telst for­mennska Arnaldar Sölva í fjár­málaráði hluti af akademísku starfi hans við Háskóla Ís­lands. HÍ styður við störf formanns Með sam­komu­laginu er tryggt að Háskóli Ís­lands styðji við þann hluta starfs Arnaldar Sölva sem tengist fjár­málaráði og út­vegi honum jafn­framt aðstöðu til að sinna störfum sínum. Mark­miðið er að skapa fag­legri um­gjörð um starf­semi fjár­málaráðs, sem hefur það hlut­verk að leggja sjálf­stætt mat á stefnumörkun í opin­berum fjár­málum. Sjá einnig Fjármálaráð: Hallalaus fjárlög jafngilda ekki aðhaldi „Fjár­málaráð gegnir mikilvægu hlut­verki í að veita ríkinu aðhald. Þessi breyting styrkir stofnanaum­gjörð ráðsins og eflir á sama tíma burði hag­fræði­deildar Háskóla Ís­lands til rannsókna í opin­berum fjár­málum,“ segir Daði Már í til­kynningu ráðu­neytisins. Metur fjár­mála­stefnu og fjár­málaáætlun Fjár­málaráð starfar sam­kvæmt lögum um opin­ber fjár­mál og er sjálf­stætt í störfum sínum. Ráðinu er ætlað að tryggja að fram fari hlutlægt mat á stefnumörkun í opin­berum fjár­málum. Það leggur meðal annars mat á hvort fimm ára fjár­mála­stefna og fjár­málaáætlun stjórn­valda fylgi þeim grunn­gildum sem lög um opin­ber fjár­mál kveða á um. Í ein­földu máli á fjár­málaráð að veita óháð aðhald að ríkis­fjár­málum og leggja mat á hvort áætlanir stjórn­valda séu trúverðugar, sjálf­bærar og í samræmi við lög­bundin mark­mið.