Katar er eitt ríkasta land í heimi en þjóðin stendur nú frammi fyrir alvarlegri efnahagskreppu vegna stríðsins í Íran. Frá því að Hormússundið lokaði fyrir tveimur mánuðum síðan hefur útflutningur frá Katar dregist verulega saman. Á vef New York Times segir að efnahagur Katar byggist að stórum hluta á gasútflutningi og nemur það um 60% af ríkistekjum landsins. Í áratugi hefur þjóðin byggt upp umfangsmikla innviði og flutt út jarðgas fyrir tugi milljarða dala til Asíu og Evrópu í gegnum Hormússundið. Ras Laffan, stærsta gasvinnslusvæði Katar, hefur til að mynda neyðst til að loka eftir eldflaugaárásir frá Íran. Jarðgasframleiðslugeta í landinu hefur dregist saman um 17% og á sama tíma standa hafnir landsins nær auðar. Innflutningur á varningi til Katar, þar á meðal bifreiðum og matvælum, hefur þar að auki raskast verulega. Sjá einnig ESB-ríki bæta í kaup á rúss­nesku gasi „Gasútflutningur er grunnurinn að öllu því sem hefur verið byggt upp hérna. Án orkunnar hefði ekkert af þessu verið mögulegt,“ segir Ahmed Helal hjá ráðgjafarfyrirtækinu Asia Group. Katar byrjaði að umbreyta gasiðnaði landsins á tíunda áratugnum þegar ríkið fjárfesti í tækni sem gerði landinu kleift að kæla gas niður í fljótandi form til útflutnings. Þar með gat Katar selt gas til markaða um allan heim án þess að reiða sig á leiðslukerfi nágrannaríkja. Um 60 þúsund tonn voru flutt til Japans með fyrstu sendingu árið 1996 og síðan þá jókst framleiðslugeta landsins upp í 77 milljón tonn árið 2010. Auðurinn sem Katar fékk frá jarðgasútflutningi fjármagnaði meðal annars stórfellda uppbyggingu í Doha, neðanjarðarlestarkerfi, lúxusinnviði, HM í knattspyrnu árið 2022 og ríkissjóð sem er metinn á 600 milljarða dala með eignum víða um heim.