Olíu­verð stefnir í mestu mánaðar­lækkun frá árinu 2020 þar sem fjár­festar binda vonir við að sam­komu­lag milli Bandaríkjanna og Írans leiði til þess að siglingar um Hor­mússund komist smám saman í eðli­legt horf. Verð á Brent-hráolíu, alþjóð­legu viðmiði á olíu­markaði, hefur lækkað um nærri 20% það sem af er maí. Verðið hefur lækkað jafnt og þétt síðustu tvær vikur eftir því sem merki hafa komið fram um að Was­hington og Teheran gætu verið að nálgast sam­komu­lag. Brent-hráolía lækkaði um 1,8% á föstu­dag og var í um 92 dölum á tunnu. Daginn áður sögðu bandarískir em­bættis­menn að Bandaríkin væru nærri sam­komu­lagi um fram­lengingu vopna­hlés við Íran og endur­opnun Hor­mússunds. Financial Times greinir frá. Bandarískur em­bættis­maður sagði að samninga­menn ríkjanna hefðu náð saman um vilja­yfir­lýsingu. Donald Trump Bandaríkja­for­seti hefði hins vegar ekki samþykkt skjalið og þyrfti nokkra daga til að fara yfir það. Hor­mússund er ein mikilvægasta siglinga­leið heims fyrir olíu og gas. Um fimmtungur heims­við­skipta með olíu og gas fer alla jafna um sundið. Þegar siglingar þar stöðvast eða dragast veru­lega saman hefur það því bein áhrif á orku­markaði, verðbólgu­væntingar og markaði víða um heim. Íran lamaði um­ferð um sundið á fyrstu dögum átakanna með hótunum um að skjóta á skip. Bandaríkin settu síðan á flota­hömlur um miðjan apríl til að koma í veg fyrir að skip færu til eða frá írönskum höfnum. Olíu­verð rauk upp í kjölfarið og hluta­bréfa- og skulda­bréfa­markaðir lækkuðu þegar fjár­festar óttuðust orku­skort og nýtt verðbólgu­skot. Sam­kvæmt þeim drögum sem nú eru til um­ræðu myndi Íran leyfa siglingum um Hor­mússund að aukast smám saman og fjar­lægja tundur­dufl úr sundinu. Þá myndi Íran ekki inn­heimta gjöld af skipum á 60 daga tíma­bili sam­komu­lagsins, sam­kvæmt heimildar­mönnum sem þekkja til viðræðnanna. Michael Zig­mont, annar yfir­maður við­skipta hjá Vis­dom Invest­ment Group, segir fjár­festa fyrst og fremst horfa til þess hvenær skipin fari aftur að sigla um sundið. Hann segir olíu­verð lík­legt til að lækka áfram þegar fyrstu olíu­skipin fari af stað og síðan enn frekar þegar veru­legt fram­boð komi aftur inn á markaðinn. Jordan Rochester, yfir­maður skulda­bréfa­stefnu fyrir Evrópu, Mið-Austur­lönd og Af­ríku hjá Mizu­ho, tekur í sama streng. Hann segir lykil­at­riðið ekki orðalag sam­komu­lagsins eitt og sér heldur raun­veru­legt flæði olíu­skipa um Hor­mússund. Sam­komu­lagið eins og það liggi nú fyrir myndi heimila um­ferð um sundið að aukast jafnt og þétt. Þótt olíu­verð hafi lækkað mikið er það enn hátt í sögu­legu sam­hengi. Brent-verð hækkaði um 63% fyrsta mánuð átakanna og er enn meira en 25% yfir því sem það var fyrir stríðið. Lækkun olíu­verðs hefur jafn­framt haft áhrif á skulda­bréfa­markaði. Ríkis­skulda­bréf hafa hækkað í verði síðustu daga þar sem fjár­festar telja minni líkur á verstu sviðs­mynd fyrir verðbólgu ef Hor­mússund verður opnað á ný. Ávöxtunar­krafa tíu ára bandarískra ríkis­bréfa hefur lækkað um 0,13 pró­sentu­stig það sem af er vikunni og var 4,44%. Ávöxtunar­krafa tíu ára breskra ríkis­bréfa hefur lækkað um 0,1 pró­sentu­stig í 4,81%. Grein­endur Deutsche Bank sögðu á föstu­dag að lægra olíu­verð hefði orðið til þess að fjár­festar væru farnir að verð­leggja minni hættu á stöðnun með verðbólgu í heims­hag­kerfinu. Eftir því sem ótti við verðbólgu hefur minnkað hafa fjár­festar einnig dregið úr væntingum um frekari vaxta­hækkanir stærstu seðla­banka heims. Á fram­virkum mörkuðum er nú talið um 50% líkur á því að bandaríski seðla­bankinn hækki vexti fyrir lok árs 2026. Fyrir viku síðan var markaðurinn búinn að verð­leggja eina 0,25 pró­sentu­stiga hækkun að fullu. Á evru­svæðinu gera markaðir enn ráð fyrir tveimur 0,25 pró­sentu­stiga vaxta­hækkunum á næsta ári, en líkurnar á þriðju hækkuninni hafa minnkað veru­lega. Hluta­bréf hækkuðu einnig á föstu­dag. Fram­virkir samningar bentu til þess að S&P 500-vísi­talan á Wall Street myndi ná nýju meti við opnun markaða, studd af áfram­haldandi hækkunum tengdum gervi­greind. Stoxx Europe 600-vísi­talan hækkaði um 0,5%. Óvissan er þó ekki horfin. Sam­komu­lag hefur ekki verið endan­lega undir­ritað og hluti fjár­festa efast enn um að endur­opnun Hor­mússunds dugi ein og sér til að koma orkumörkuðum fljótt í sama horf og fyrir stríð. Kieran Tomp­kins, hrávöru­hag­fræðingur hjá Capi­tal Economics, segir endur­opnun sundsins nauð­syn­legt skref í átt að eðli­legra ástandi á orku­markaði. Hún sé hins vegar ekki nægi­leg ein og sér til að færa orku­verð hratt aftur niður á það stig sem það var á fyrir átökin. Það sést einnig á fram­virkum olíu­samningum. Samningar til skamms tíma hafa lækkað í takt við fréttir af mögu­legu sam­komu­lagi, en olíu­samningar til lengri tíma hafa hreyfst mun minna. Rochester hjá Mizu­ho segir það endur­spegla efa­semdir markaðarins, þreytu gagn­vart sí­felldum fyrir­sögnum um viðræðurnar og þá skoðun að tjón hafi þegar orðið á langtíma­fram­boði. Með öðrum orðum: markaðurinn hefur tekið undir að hættan á verstu sviðs­mynd hafi minnkað, en verð­leggur enn tölu­verða óvissu um hversu hratt olíuflæði og orku­markaðir komast aftur í jafn­vægi.