Alma Möller heilbrigðisráðherra vill tafarlausar aðgerðir gegn offitu og að Íslendingar hætti að vera þyngstir Norðurlandabúa. Í því skyni hefur ráðherra lagt fram þingsályktunartillögu um aðgerðaáætlun gegn offitu til 2030 - þar segir að ekki sé hægt að bíða lengur, verði ekkert að gert verði 192.000 Íslendingar í ofþyngd eða í offitu eftir fjögur ár og að um 3.000 þeirra lifi við skert lífsgæði vegna þess. Aðgerðaáætlun heilbrigðisráðherra skiptist í þrennt; forvarnir og skimun, rannsóknir og skráningu og að efla heilbrigðisþjónustu fyrir börn og fullorðna. „Þar sem offita hefur margar flóknar og oft samtengdar orsakir er þörf á heildstæðri stefnumótun sem hvetur til fjölþættra aðgerða, ekki einungis í heilbrigðiskerfinu, heldur í samfélaginu öllu, með aðgerðum sem nálgast vandann af þeim þunga sem hann krefst,“ segir í þingsályktunartillögunni. Tillögurnar eru tuttugu og ein og meðal annars er lagt til að vinna gegn fordómum, kanna mataræði barna og skima ungmenni sérstaklega og koma á samræmdu skráningarkerfi um offitu. Heilbrigðisráðherra vill skera upp herör gegn offitu og meðhöndla hana eins og langvinnan sjúkdóm. Skoða á óhollustuskatt, endurskoða greiðsluþátttöku í þyngdarstjórnunarlyfjum og fjölga meðferðarúrræðum. Óholluskattur til skoðunar Þá vill ráðherra skoða verðlækkun á hollum mat, hækka þann óholla og að óhollar og gjörunnar matvörur verði merktar sérstaklega. „Við vitum að það virkar að greiða niður holla vöru og leggja álögur á óholla vöru. En hvernig það verður nánar útfært, er ekki tímabært að segja,“ segir Alma. Vilja endurskoða niðurgreiðslu lyfja og aðgerða Kemur til greina að auka aðgengi fólks að þyngdarstjórnunarlyfjum? Niðurgreiða þau fyrir stærri hóp en nú er? „Það er eitt af þeim atriðum sem er nefnt.“ Kemur til greina að aðgerðir eins og efnaskiptaaðgerðir verði niðurgreiddar fyrir stærri hóp en er núna? „Það er sömuleiðis í þingsályktunartillögunni. Og til þess þarf að gera leiðbeiningar um hvenær þessar aðgerðir eru viðeigandi,“ segir Alma. „Fyrir þá sem eru þegar orðnir í vanda með fylgisjúkdóma þá er þetta, bæði lyfin og skurðaðgerðir mikilvægt. En sem menntuð í lýðheilsuvísindum vil ég auðvitað beina áherslunni að rót vandans.“