Gengi krónunnar hefur verið óvenju stöðugt undan­farin ár þrátt fyrir við­skipta­halla, verðbólgu og háa vexti. Greining Ís­lands­banka telur að sú staða geti haldist næsta kastið, en spáir því þó að krónan gefi smám saman eftir þegar líður á næstu ár. Í nýrri þjóðhags­spá bankans kemur fram að krónan hafi verið „gletti­lega stöðug“ þrátt fyrir að ýmis­legt hafi gengið á bæði innan­lands og utan. Meðal­gengi krónunnar miðað við gengis­vísitölu Seðla­banka Ís­lands var nánast hið sama árin 2023 og 2024 og eftir lítils­háttar styrkingu í fyrra hefur krónan sótt frekar í sig veðrið það sem af er þessu ári. „Sem fyrr styður eitt og annað við krónuna á næstunni. Út­lit er fyrir minnkandi við­skipta­halla við útlönd, er­lend staða þjóðar­búsins er sterk, gjald­eyris­forði Seðla­bankans myndar­legur, stoðir hag­kerfisins traustar og vaxta­munur við útlönd verður áfram nokkur,“ segir í greiningu bankans. Bankinn bendir á að við­skipta­hallinn undan­farin ár hafi að hluta verið fjár­magnaður með hreinu inn­flæði á fjár­magns­jöfnuði. Þá hafi gjald­eyris­flæði vegna utan­ríkis­við­skipta reynst hag­felldara en ætla mætti við fyrstu sýn. Líf­eyris­sjóðir keyptu jafn­framt minna af gjald­eyri í fyrra en oft áður og er­lend lán­taka fyrir­tækja var nokkur. Þrátt fyrir þetta telur Ís­lands­banki að þrýstingur á krónuna muni aukast með tímanum. Ástæðan er ekki síst hátt raun­gengi. Með öðrum orðum er Ís­land dýrt í alþjóð­legum saman­burði, sem þrengir að út­flutnings­greinum. Í greiningunni segir að þar sem laun og verðlag hækki hraðar hér á landi en í helstu við­skiptalöndum fari „ekki hjá því að nafn­gengi krónu þurfi að gefa eftir síðar meir, annaðhvort hægt og bítandi eða með stærri leiðréttingu þegar frá líður“. Grunn­spá Ís­lands­banka gerir ráð fyrir fyrri kostinum, það er hæg­fara veikingu fremur en snöggri leiðréttingu. Bankinn spáir því að evran kosti 144,7 krónur að meðaltali í ár, 148,8 krónur á næsta ári og 152 krónur árið 2028. Það jafn­gildir því að krónan verði um fimm pró­sentum veikari í lok spátímans en hún var í lok síðasta árs. Óvissan er þó veru­leg. Í greiningunni er nefnt að slakur vetur í ferðaþjónustu, minna inn­flæði er­lends fjár­magns eða versnandi við­skipta­kjör gætu aukið þrýsting á krónuna. Á móti vegur að er­lend staða þjóðar­búsins er sterk og að við­skipta­hallinn er talinn verða minni á næstu árum en hann hefur verið að undan­förnu.