Allsherjar- og menntamálanefnd leggur til að 19 einstaklingar fái íslenskan ríkisborgararétt með lögum frá Alþingi. Nefndinni bárust 166 umsóknir um ríkisborgarrétt á vorþingi 157. löggjafarþings og leggur til að 14 þeirra verði samþykktar auk fjögurra barna umsækjenda. Þá leggur nefndin til að einum til viðbótar verði veittur ríkisborgararéttur vegna misritunar í lögum. Tvær leiðir eru færar til að fá íslenskan ríkisborgararétt. Önnur er að sækja um til Útlendingastofnunar, hin að sækja um hann til Alþingis. Allsherjar- og menntamálanefnd vill að fólk verði að sækja um ríkisborgararétt til Útlendingastofnunar áður en það sendir inn umsókn til Alþingis. Nefndin hefur lagt fram tillögu þess efnis til þingsályktunar.