Veiðin síðasta sumar var dræm og töluvert undir meðaltalsveiði frá áramótum. Guðni Guðbergsson, sviðsstjóri hjá Hafrannsóknastofnun, segir að vorið 2025 hafi verið laxastofninum hagstætt. Almennt hafi útganga seiða verið á eðlilegum tíma og fjöldi seiða í seiðamælingum almennt í góðu standi. Guðni Guðbergsson. Spurður hvaða væntingar hann geri til laxveiðinnar í sumar samanborið við undanfarin ár svarar Guðni: „Samkvæmt líkani sem ­Jóhannes ­Guðbrandsson hefur ­verið að þróa út frá tengslum sjávar­hita vestur af Íslandi árið sem gönguseiði ganga til sjávar má búast við að smálaxaveiði á Vesturlandi ­aukist, en um 40% af lax­veiðinni eru á Vesturlandi. Það eru tengsl á milli fjölda smálaxa og stórlaxa árið á eftir. Þar sem það voru ekki stórar göngur smálaxa á síðasta ári er ekki við því að búast að það verði mikið af stórlaxi í sumar.“ Óttast að veiðin verði undir 10 ára meðaltali Á síðustu tíu árum hefur meðal­talsveiðin í íslenskum laxveiði­ám verið í kringum 41 þúsund laxar. Guðni óttast að veiðin í sumar verði undir þessu meðal­tali. „Þar er óvissan reyndar mest varðandi Rangárnar, þar sem þar er um hafbeitarseiði að ræða og fjöldi seiða mikill, hátt í 500 þúsund seiði í hvorri Rangánna. Annað sem er að koma fram er að veiðihlutfall hefur ferið lækkandi í þeim ám þar sem við höfum teljara. Líklega einkum vegna þess að víða er eingöngu veitt á flugu.“ Frá árinu 2018 hafa verið töluverðar sveiflur í veiðinni eins og sjá má bæði á súluritinu og línuritinu sem fylgja þessari umfjöllun. Segist Guðni ekki geta svarað hvað valdi þessu. „Það gæti verið freistandi að segja hnúðlax, þar sem hann er á oddatöluárum, en það er samt afar ólíklegt,“ segir hann. Guðni segir ástandið á villta íslenska laxastofninum misjafnt enda stofnarnir margir. Heilt yfir sé laxagengd minnkandi. Spurður hvaða áhrif sjávarskilyrði, sjávarhiti og fæðuframboð í Norður-Atlantshafi hafi haft á endurheimtur laxa undan­farið svarar Guðni: „Almennt hafa endurheimtur í Atlantshafi verið lækkandi. Hins vegar hafa heimtur í Elliðaár verið góðar síðustu ár en við höfum of fá ár með mælingum á endurheimtum." „Tíðarfar er óstöðugra en áður og ef það er óstöðugleiki er erfið­ara að ráða í framvindu," segir Guðni. „Almennt þýðir hærri sjávarhiti betri skilyrði fyrir afkomu laxa. Svo eru tengsl á milli sjávarhita og vatnshita. Þegar hitastig árvatns er hátt eykst vaxtarhraði seiða og svo öfugt. Hærri vöxtur styttir kynslóðatíma en þar munar mest um vorhitann. Útganga gönguseiða fer af stað þegar vatnshiti hver yfir 10°C, hvenær sem það svo gerist.“ Nánar er fjallað um málið í sérblaðinu Veiði , sem fylgdi Viðskiptablaðinu. Áskrifendur geta lesið greinina í heild hér .