Framkvæmdastjóri Sambands íslenskra sveitarfélaga segir íslenska ríkið brjóta samkomulag við sveitarfélögin með nýrri reglugerð um ábyrgð í málefnum barna með fjölþættan vanda eftir að ríkið endurskilgreindi hópinn sem fellur undir þjónustuna. Samkomulag var gert milli ríkis og sveitarfélaga í mars í fyrra um að ríkið tæki að sér framkvæmd og bæri ábyrgð á fjármögnun sérhæfðrar þjónustu við börn með fjölþættan vanda sem búsett eru utan heimilis. Framkvæmdastjóri Sambands íslenskra sveitarfélaga segir íslenska ríkið brjóta samkomulag við sveitarfélögin með nýrri reglugerð um ábyrgð í málefnum barna með fjölþættan vanda. Um tveir milljarðar gætu bæst við útgjöld sveitarfélaganna á næsta ári. Börnin með flóknustu þjónustuþarfirnar á ábyrgð sveitarfélaganna Samkvæmt Sambandi íslenskra sveitarfélaga hafa þessi börn verið um 34 að jafnaði en með nýrri reglugerð sem var birt í upphafi mánaðar hafi ríkið einhliða endurskilgreint og þrengt hópinn sem fellur undir samkomulagið. Nú verði um 20 eftir og 14 verði á ábyrgð sveitarfélaganna. „Þarna er um að ræða börn sem eru með flóknustu þjónustuþarfirnar varðandi fjölþættan vanda barna og það er tekin ákvörðun um það að þau verði eftir hjá sveitarfélögunum,“ segir Arnar Þór Sævarsson, framkvæmdastjóri SÍS. Þjónustan við börnin var áætluð um 3,5 milljarðar á ársgrundvelli þegar ríkið tók við málaflokknum í fyrra. Nú fellur stór hluti af kostnaðinum aftur á sveitarfélögin, Arnar áætlar að það gæti orðið um 1,5 til 2 milljarðar á næsta ári. Sambandið segir málið snúast um traust milli ríkis og sveitarfélaga. „Þetta kemur náttúrulega eins og stormsveipur og við gengum náttúrulega út frá því í öllum okkar áætlunum og samskiptum við ríkið að þetta samkomulag myndi halda. Sveitarfélög eru náttúrulega í fjárhagsáætlunargerð og þurfa þá væntalega að gera ráð fyrir þessum breytingum.“ Ráðuneytið vísar gagnrýninni á bug Mennta- og barnamálaráðuneytið svarar gagnrýni SÍS í fréttatilkynningu . Þar segir að ráðuneytið telji forsendur skýrar og að gagnrýni á reglugerðina eigi ekki við rök að styðjast. Vísar ráðuneytið í skýrslur sem fjalla um hvaða hóp reglugerðin á við um auk samtala og formlegra funda milli ríkis og sveitarfélaga. Þar segir ráðuneytið að komið hafi fram sameiginlegur skilningur um að börn sem hafi mjög mikla þjónustuþörf vegna fötlunar í daglegu lífi falli ekki undir samkomulagið frá því í mars í fyrra. „Grunnþjónustuþörf þessara barna leiðir fyrst og fremst af fötlun og langvarandi stuðningsþörfum. Ef sá hópur væri á ábyrgð ríkisins væri það annars konar og mun víðtækara samkomulag en það sem gert var 19. mars 2025. Slík túlkun samræmist hvorki þeim skýrslum sem unnar hafa verið um málaflokkinn né þeim áralöngu viðræðum sem fóru fram milli ríkis og sveitarfélaga áður en samkomulagið var gert,“ segir í tilkynningunni. Ekki náðist í Ingu Sæland mennta- og barnamálaráðherra eða aðstoðarmenn hennar í dag. Fréttin var uppfærð með viðbrögðum ráðuneytisins.