Binance, stærsta rafmyntakauphöll heims, hefur tilkynnt viðskiptavinum sínum innan Evrópusambandsins að fyrirtækið hætti að veita þeim þjónustu frá og með næstu viku þar sem það hafi ekki fengið starfsleyfi samkvæmt nýjum MiCA-reglum ESB. Frá 1. júlí þurfa öll rafmyntafyrirtæki sem starfa innan sambandsins að hafa slíkt leyfi, annars eiga þau á hættu að vera sektuð. Binance sótti um leyfi í Grikklandi sem hefði gilt um allt ESB, en umsóknin gekk ekki eftir er kemur fram í frétt Financial Times. Fyrirtækið dró hana til baka skömmu áður en fresturinn rann út og hyggst nú reyna að fá leyfi í Frakklandi. Niðurstaða þeirrar umsóknar kæmi þó ekki í bráð og er Binance því enn óheimilt að veita þjónustu þangað til svar liggur fyrir. Viðskiptavinir Binance í Póllandi, Ítalíu, Spáni og Frakklandi hafa fengið tölvupóst með leiðbeiningum um hvernig þeir geti tekið fé sitt út af kauphöllinni, þar sem félagið fái ekki MiCA-leyfi fyrir 30. júní 2026. Binance segir þó eignir notenda öruggar og að ekki sé verið að hvetja alla til að taka fé sitt út fyrir 1. júlí. Leyfismálið er mikið áfall fyrir Binance, sem hefur reynt að styrkja ímynd sína gagnvart eftirlitsyfirvöldum eftir sektir og dómsmál víða um heim. Sjá einnig Binance sakað um fjármögnun hryðjuverka