Sífellt hækkandi verðmat bandarískra hlutabréfa, miklar sveiflur í markaðsvirði stærstu fyrirtækja heims og skyndilegar lækkanir á mörkuðum hafa ýtt undir áhyggjur af því að ný hlutabréfabóla sé að myndast í Bandaríkjunum. Frá þessu greinir Reuters. Einna helst hefur þróun á sviði tækni- og gervigreindar vakið athygli í þessu samhengi, en nú velta sérfræðingar fyrir sér hvort verðhækkanir síðustu ára endurspegli raunveruleg verðmæti eða hvort um sé að ræða ofmat sem geti reynst ósjálfbært til lengri tíma. Áhyggjur jukust enn í síðustu viku þegar hlutabréf í tæknifyrirtækjum lækkuðu skarpt vegna efasemda um umfang skuldfjármagnaðra fjárfestinga í gervigreind og væntinga um harðari vaxtastefnu bandaríska seðlabankans. Að því sögðu hafa markaðir náð nokkru jafnvægi á ný, studdir af sterkri afkomu fyrirtækja og breiðari þátttöku fjárfesta í hækkunum á hlutabréfamarkaði. Sérfræðingar benda þó á að staðan sé viðkvæm. Þá benda ýmsir mælikvarðar til þess að verðmat bandarískra hlutabréfa sé komið á sögulega háar slóðir. Þar á meðal má líta til hinnar svokölluðu Buffett-vísitölu, sem ber saman heildarmarkaðsvirði bandarískra hlutabréfa og verga landsframleiðslu. Hún mældist 218% á fyrsta ársfjórðungi og er því skammt frá sögulegu hámarki. Sérfræðingar benda þó á að hefðbundnir mælikvarðar, á borð við verð- og hagnaðarhlutfall, hafi ekki enn náð þeim hæðum sem sáust í tæknibólunni um aldamótin. Sterk afkoma fyrirtækja hafi að einhverju leyti réttlætt hátt verðmat, þótt efasemdir séu uppi um hversu varanlegur sá hagnaður reynist. Þá eru miklar fjárfestingar í gervigreind jafnframt í brennidepli. Þeir sem framleiða búnað og innviði fyrir tæknina hafa notið mikils ávinnings, en óvissa ríkir enn um hvort fyrirtækin sem fjárfesta milljörðum dollara í uppbyggingunni nái að skila sambærilegri arðsemi. Þrátt fyrir vaxandi áhyggjur benda aðrir markaðsaðilar á að ekki séu enn komin fram þau merki um ofuráhuga og óhóflega bjartsýni sem gjarnan hafa einkennt fyrri markaðsbólur. Þá hafi hækkanir á hlutabréfamarkaði á síðustu misserum einnig dreifst á fleiri atvinnugreinar en áður. Þrátt fyrir að ekki sé hægt að fullyrða að ný hlutabréfabóla hafi myndast séu áhættumerkin orðin fleiri og fjárfestar ættu að gæta að dreifingu eigna sinna og gera ráð fyrir auknum sveiflum á mörkuðum á næstu misserum.