Þrjú svo­kölluð vaxtar- og þróunarfélög á aðal­markaði Kaup­hallarinnar, Ocu­lis, Al­vot­ech og Amaroq, eru meðal þeirra félaga sem hafa lækkað mest það sem af er ári. Hluta­bréfa­verð Ocu­lis hefur lækkað mest það sem af er ári en gengið hefur farið niður um rúm 31%. Á sama tíma hefur gengi Al­vot­ech lækkað um 27,5% og Amaroq um 18,7%. Um er að ræða þrjú félög sem fjár­festar hafa á undan­förnum árum verðlagt að stórum hluta út frá væntingum um framtíðar­vöxt, leyfis­veitingar, rannsóknarniður­stöður eða fram­leiðslu­aukningu. Sjávarútvegsfélög á uppleið Á hinni hliðinni hafa sjávarút­vegs­félögin Síldar­vinnslan, Brim og Ís­félagið hækkað mest af félögum á aðal­markaði. Síldar­vinnslan hefur hækkað um 27,6% frá áramótum, Brim um 24,3% og Ís­félagið um 16,9%. Þróunin undir­strikar skýra skiptingu á markaðnum það sem af er ári. Fjár­festar hafa refsað félögum þar sem stór hluti virðisins byggir á óvissum framtíðaráföngum, en á sama tíma verðlagt sjávarút­vegs­félögin hærra eftir sterka af­komu, góða loðnu­vertíð og hagstæð skil­yrði á mörkuðum með sjávar­afurðir. Mesta lækkunin er hjá Ocu­lis. Gengi félagsins hrundi í júní eftir að tvær lykil­rannsóknir á OCS-01 augn­dropum við sjón­himnu­bjúg af völdum sykursýki náðu ekki aðal­mark­miði sínu. Félagið til­kynnti að það hygðist ekki sækja um markaðs­leyfi fyrir lyfið að svo stöddu og myndi beina fjár­magni og þróunar­starfi að öðrum verk­efnum. Viðbrögð markaðarins voru hörð. Hluta­bréf Ocu­lis féllu um meira en helming í fyrstu við­skiptum á ís­lenska markaðnum eftir til­kynninguna og höfðu áður lækkað mikið í Bandaríkjunum. Fallið hafði áhrif á ís­lenska hluta­bréfa­markaðinn í heild, enda hafði Ocu­lis orðið eitt stærsta félagið í Kaup­höllinni eftir skráningu á aðal­markað. Al­vot­ech hefur einnig átt erfitt ár á markaði. Gengi félagsins hefur lækkað um 27,5% frá áramótum, þrátt fyrir nokkur jákvæð tíðindi á síðustu vikum. Félagið hefur á árinu unnið að því að svara at­huga­semdum Mat­væla- og lyfja­stofnunar Bandaríkjanna, FDA, og lagt að nýju inn um­sóknir um markaðs­leyfi í Bandaríkjunum fyrir hliðstæður við líftækni­lyfin Simponi, Simponi Aria og Ey­lea. Sjá einnig Hriktir enn í tekju­stoðum Al­vot­ech Bréf Al­vot­ech náðu lægstu gildum frá skráningu í júní en tóku síðan við sér eftir að félagið greindi frá nýjum skrefum gagn­vart FDA. Þrátt fyrir það er gengi félagsins enn veru­lega lægra en í upp­hafi árs. Lækkunin endur­speglar að fjár­festar hafa verðlagt félagið varfærnar eftir at­huga­semdir eftir­lit­saðila og minni tekjur en væntingar höfðu áður gert ráð fyrir. Amaroq hefur lækkað um 18,7% frá áramótum. Gengi félagsins hefur sveiflast mikið með heims­markaðsverði gulls, sem fór í hæstu hæðir fyrr á árinu en hefur síðan lækkað veru­lega frá toppi. Amaroq hækkaði um tíma sam­hliða hækkun gull­verðs, en gaf eftir þegar gull­verð lækkaði á ný. Félagið hefur á sama tíma verið að byggja upp námu­vinnslu á Græn­landi og hefur meðal annars kynnt jákvæðar niður­stöður borana. Það breytir þó ekki því að hluta­bréfa­verð Amaroq hefur reynst viðkvæmt fyrir sveiflum í gull­verði og áhættusækni fjár­festa gagn­vart námu- og þróunarfélögum. Sjávarút­vegs­félögin hafa farið í hina áttina. Síldar­vinnslan hefur hækkað mest af félögum á aðal­markaði, eða um 27,6% frá áramótum. Góð loðnu­vertíð, sterkir bol­fisk­markaðir og góð veiði bol­fisks­skipa lyftu af­komu félagsins á fyrsta árs­fjórðungi. Síldar­vinnslan skilaði 35,1 milljón evra hagnaði á fyrsta árs­fjórðungi, jafn­virði um 5,1 milljarðs króna. Hagnaðurinn fimm­faldaðist frá sama tíma í fyrra og rekstrar­tekjur jukust um 44,6% milli ára. Í fjár­festa­kynningu félagsins kom fram að af­koman hefði einkum litast af góðri loðnu­vertíð eftir tvö lé­leg ár, mikilli fram­leiðslu loðnu­afurða, góðri veiði Blængs og bol­fisks­skipa og sterkum bol­fisk­mörkuðum. Brim hefur hækkað um 24,3% frá áramótum og Ís­félagið um 16,9%. Hækkunin hjá sjávarút­vegs­félögunum kemur eftir erfitt tíma­bil í greininni, þar sem loðnu­brestur, hátt vaxta­stig, kostnaðar­hækkanir og um­ræða um hærri veiðigjöld höfðu þrýst á verðmöt. Markaðurinn virðist nú hafa verðlagt inn betri rekstrar­skil­yrði, einkum vegna loðnu­vertíðarinnar og hærra af­urða­verðs. Á móti stendur að óvissa um veiðigjöld hefur ekki horfið. Í um­ræðu um greinina hefur ítrekað verið bent á að fyrir­hugaðar breytingar geti hækkað gjöld sjávarút­vegs­fyrir­tækja á næstu árum og haft neikvæð áhrif á af­komu, sér­stak­lega ef afla­magn eða af­urða­verð þróast óhagstætt. Hækkun sjávarút­vegs­bréfanna sýnir þó að fjár­festar horfa nú fyrst og fremst til betri skammtíma­af­komu. Loðnu­vertíðin hefur skipt þar miklu, en sterkir bol­fisk­markaðir hafa einnig stutt við reksturinn. Þróunin á aðal­markaði það sem af er ári er því tví­skipt. Annars vegar hafa Ocu­lis, Al­vot­ech og Amaroq lækkað eftir áföll, tafir eða ytri sveiflur sem tengjast rannsóknarniður­stöðum, eftir­lits­ferlum og gull­verði. Hins vegar hafa Síldar­vinnslan, Brim og Ís­félagið hækkað í takt við betri af­komu­horfur í sjávarút­vegi. Fjár­festar hafa þannig fært sig frá félögum þar sem væntingar um framtíðará­fanga ráða miklu um verðmatið og yfir í félög sem hafa sýnt sterkara sjóð­streymi og betri rekstur á yfir­standandi ári.