Steypubíll fór út af brú yfir Þjórsá við Sultartangastöð nú á áttunda tímanum í kvöld, samkvæmt upplýsingum lögreglunnar á Suðurlandi. Ökumaðurinn var einn í bílnum. Þyrla Landhelgisgæslunnar var kölluð út og var fyrst á staðinn. Samkvæmt upplýsingum Landhelgisgæslunnar var ökumanni steypubílsins bjargað upp í þyrluna af hlið bílsins og er nú á leið til Reykjavíkur til aðhlynningar. Ökumaðurinn var orðinn kaldur en ekki er vitað um ástand hans að öðru leyti. Fréttin hefur verið uppfærð með upplýsingum um björgun ökumannsins.