Hlutabréf breska lyfjarisans AstraZeneca lækkuðu um 9% í viðskiptum í London í morgun eftir að félagið greindi frá því að hjartalyfið Wainua hefði ekki náð meginmarkmiði sínu í III. stigs klínískri rannsókn. Financial Times greinir frá. Niðurstöðurnar sýndu að lyfið veitti ekki tölfræðilega marktækan ávinning við að draga úr dauðsföllum af völdum hjarta- og æðatengdra fylgikvilla. Wainua er þróað í samstarfi við bandaríska líftæknifyrirtækið Ionis og er ætlað til meðferðar við sjaldgæfum hjartasjúkdómi sem stafar af uppsöfnun próteina í hjartavöðvanum. AstraZeneca sagði að þótt rannsóknin hefði ekki staðið undir væntingum myndu niðurstöðurnar engu að síður auka þekkingu á mögulegum meðferðarúrræðum við sjúkdómnum, sem talið er að hrjái 300 til 500 þúsund manns um heim allan. Þetta er annað áfall félagsins á skömmum tíma. Í maí frestuðu bandarísk heilbrigðisyfirvöld afgreiðslu umsóknar um markaðsleyfi fyrir nýtt krabbameinslyf AstraZeneca. Félagið hefur þó einnig greint frá sterkum árangri í öðrum lyfjarannsóknum að undanförnu og tilkynnti um jákvæðar niðurstöður úr 16 III. stigs rannsóknum á síðasta ári.