OpenAI og Google selja aðgang að háþróuðum gervigreindarlíkönum sínum til kínverskra tæknirisa sem Pentagon, varnarmálaráðuneyti Bandaríkjanna, hefur sett á svartan lista. Þetta er sagt sýna glufu í tilraunum bandarískra stjórnvalda til að hægja á uppbyggingu Kína á sviði gervigreindar. Fyrirtækin staðfestu við Financial Times að þau hefðu veitt dótturfélögum Alibaba, Baidu og Tencent í Singapúr slíka þjónustu. Bandarísk stjórnvöld hafa sakað fyrirtækin um tengsl við kínverska herinn. OpenAI sagðist hafa lokað á aðgang notenda tengdra Alibaba að forritaskilum sínum vegna gruns um misnotkun í síðasta mánuði. Þar var einkum vísað til svokallaðrar eimingar (e. distillation), þar sem niðurstöður úr einu gervigreindarlíkani eru notaðar til að bæta annað. Bandarísk stjórnvöld hafa þegar reynt að takmarka aðgang að tilteknum háþróuðum líkönum, þar á meðal Mythos og Fable frá Anthropic og GPT-5.6 frá OpenAI. Þau hafa þó ekki almennt bannað fyrirtækjum með höfuðstöðvar í Kína að nota nýjustu gervigreindarhugbúnaðinn, jafnvel þótt þau séu á lista yfir fyrirtæki með meint tengsl við kínverska herinn. Chris McGuire, sérfræðingur hjá samtökum um alþjóðasamskipti (e. Council on Foreign Relations) og fyrrverandi embættismaður í stjórn Bidens, sagði að stjórnvöld töluðu stöðugt um að Bandaríkin yrðu að standa Kína framar í gervigreind en hefðu ekki beitt útflutningseftirliti, sem nauðsynlegt væri til að hægja á Kína. OpenAI segist ekki leyfa aðgang að líkönum sínum í Kína, en heimili sumum fyrirtækjum með kínverskt eignarhald eða höfuðstöðvar að nota þjónustuna í ríkjum þar sem hægt sé að framfylgja öryggisreglum. Google segir þjónustu sína í boði í Hong Kong og Singapúr, en að landfræðilegar takmarkanir einar dugi ekki gegn færum aðilum. Anthropic hefur tekið harðari afstöðu og bannað kínverskum fyrirtækjum og erlendum félögum í þeirra eigu að nota fullkomnustu líkön sín. Fyrirtækið hefur sakað kínverskar gervigreindarstofur og Alibaba um að reyna að sniðganga reglur þess. Sérfræðingar vara við að aðgengi kínverskra fyrirtækja að gervigreindarlíkönunum geti grafið undan forskoti bandarískra gervigreindarfyrirtækja, þar sem þau fái að nýta tæknina án þess að bera sama kostnað af tölvuafli, þróun og öryggisvinnu.