Greiningarfyrirtækið Akkur gerir ráð fyrir að Icelandair hafi skilað 11,2 milljóna dala tapi á öðrum árs­fjórðungi ársins, jafn­virði um 1,4 milljarða króna. Á sama tíma­bili í fyrra hagnaðist félagið um 12,9 milljónir dala. Þetta kemur fram í af­komu­spá Akkurs fyrir upp­gjör Icelandair á öðrum árs­fjórðungi, en félagið birtir upp­gjör sitt 21. júlí. Greiningar­fyrir­tækið er eina félagið sem birtir opin­bert af­komu­mat fyrir Icelandair, þótt óbirtar spár kunni að vera til. Akkur spáir því að tekjur Icelandair hafi numið 486,2 milljónum dala á fjórðungnum og aukist um 5,1% frá sama tíma í fyrra. Þá er gert ráð fyrir að fram­boð félagsins, mælt í fram­boðnum sætiskíló­metrum, hafi dregist saman um 1,3% milli ára en að sætanýting hafi hækkað í 84%, saman­borið við 82,2% á öðrum árs­fjórðungi í fyrra. Greiningar­fyrir­tækið telur að eininga­tekjur hafi hækkað um 5,3% milli ára. Sterkari sætanýting og hækkandi eininga­tekjur skýri þannig tekju­vöxtinn þrátt fyrir minna fram­boð. Eldsneytisverð hefur áhrif Af­koman er engu að síður talin hafa versnað veru­lega. Akkur spáir því að EBITDA hafi numið 37,7 milljónum dala á fjórðungnum, saman­borið við 44,2 milljónir dala á sama tíma í fyrra. EBITDA-fram­legð er metin 7,8%, en var 9,6% í fyrra. Akkur gerir jafn­framt ráð fyrir að rekstrar­tap Icelandair, mælt á EBIT-grunni, hafi numið 10,3 milljónum dala á öðrum árs­fjórðungi. Það er veru­leg breyting frá sama tíma­bili í fyrra þegar EBIT var jákvætt um 0,8 milljónir dala. Í greiningunni kemur fram að annar árs­fjórðungur sé jafnan jákvæður hjá Icelandair á EBIT-grunni. Að þessu sinni sé hins vegar lík­legt að elds­neytis­verð hafi þrýst af­komunni niður, þrátt fyrir að Icelandair hafi verið búið að verja um 40% af elds­neytis­notkun fjórðungsins. Akkur horfir sér­stak­lega til þess hvort Icelandair upp­færi af­komu­horfur sínar í upp­gjörinu. Greiningar­fyrir­tækið bendir á að olíu­verð hafi lækkað veru­lega frá því félagið birti upp­gjör sitt fyrir fyrsta árs­fjórðung og telur að félagið kunni að upp­færa leiðsögn sína í ljósi þeirrar þróunar. Fyrir árið í heild spáir Akkur því að tekjur Icelandair nemi 1.871 milljón dala og aukist um 7,5% frá fyrra ári. EBITDA er metið 196,7 milljónir dala, sem væri 25,7% aukning milli ára. Rekstrar­hagnaður, mældur á EBIT-grunni, er hins vegar aðeins metinn 11 milljónir dala, eða 0,6% af tekjum. Sjá einnig Aukinn eldsneytiskostnaður hleypur á milljörðum Fimm atriði til að fylgjast með Akkur nefnir fimm at­riði sem fjár­festar ættu sér­stak­lega að fylgjast með í upp­gjörinu: af­komu­horfur stjórn­enda, þróun eininga­kostnaðar án elds­neytis, bókunar­stöðu og eftir­spurn, EBIT-fram­legð og áhrif ár­stíða­bundinna sveiflna á veltu­fé og skuld­setningu. Í greiningunni er áfram mælt með kaupum á bréfum Icelandair, en með fyrir­vara um að um áhættu­sama fjár­festingu sé að ræða. Síðasta mark­verð Akkurs á bréfum félagsins er 1,67 krónur á hlut. Dagsloka­gengi bréfanna 9. júlí var 0,718 krónur og því er mark­verðið 133% yfir síðasta gengi sam­kvæmt af­komu­spánni. Eins og Við­skipta­blaðið greindi frá í síðustu viku færði Akkur verðmat sitt á Icelandair upp og mat þá hluta­bréf félagsins á 1,67 krónur á hlut. Það var um 126% yfir dagsloka­gengi bréfanna daginn áður, þegar þau lokuðu í 0,74 krónum á hlut. Í verðmatinu kom fram að Akkur teldi markaðinn of svartsýnan á Icelandair og van­meta mögu­legan ávinning af flota­endurnýjun, bættri nýtingu og lægri skuld­setningu. Sjá einnig Meta Icelandair 126% yfir markaðsvirði