Hlutfall lána Landsvirkjunar sem eru með ríkisábyrgð hefur lækkað jafnt og þétt síðustu ár. Síðasta lánið er á gjalddaga 24. júlí næstkomandi en það var tekið árið 2006 vegna byggingar Fljótsdalsstöðvar, eða Kárahnjúkavirkjunar. Rafnar Lárusson, fjármálastjóri Landsvirkjunar, segir fyrirtækið hafa verið mjög skuldsett í kjölfarið, enda stór og mikil framkvæmd. „Framkvæmdunum lauk á svipuðum tíma og fjármálahrunið skall á í kringum 2008, en þá skuldaði Landsvirkjun rúma þrjá milljarða bandaríkjadala og öll lánin með ríkisábyrgð. Þetta er á sama tíma og íslenska ríkið átti takmarkað af erlendri mynt sem var svo verðmæt á þessum tíma. Það hefði verið mikil áskorun fyrir ríkið að greiða upp þau lán ef í harðbakkann hefði slegið,“ segir Rafnar. Árin eftir hrun var áhersla lögð á að greiða niður skuldir og styrkja undirstöður rekstursins. Í kringum 2012-2013 ákvað Landsvirkjun upp á sitt einsdæmi að hætta að taka ný lán með ríkisábyrgð. Rafnar tekur fram að slík lán hafi ekki falið í sér ríkisstyrk heldur hafi Landsvirkjun greitt sérstakt gjald fyrir ábyrgðina. Hvað ríkið varðar gátu slík lán haft neikvæð áhrif á lánshæfismat. „Það að við séum að borga upp eitt lán er kannski lítið í stóra samhenginu en þarna er sennilega um 60 ára sögu af ríkistengdum lánum á upphafsárum Landsvirkjunar og síðar ríkisábyrgðum að ljúka,“ segir Rafnar. „Núna erum við orðin sjálfstæð og farin að styðja ríkið, bæði með því að íþyngja ekki lánshæfismati þess og með því að greiða arðgreiðslur. Þannig þetta eru skemmtileg tímamót.“ Nánar er fjallað um málið í Viðskiptablaðinu . Áskrifendur geta lesið fréttina í heild hér .