Hrafnarnir þurfa hvorki að sækja fótboltamót barna né taka sér sumarfrí og geta því alfarið einbeitt sér að umræðunni í aðdraganda þjóðaratkvæðagreiðslunnar um aðild Íslands að Evrópusambandinu. Stjarna þeirrar umræðu er óumdeilanlega Halldór Jörgen Olesen, andlit íslensku gervigreindar­innar, sem ­hefur farið á kostum á TikTok-­síðu Sjá-hreyfingarinnar. Þar líkir hann því að segja nei við frekari aðlögun að ESB við að hafna viðreynslu frá Kylie ­Jenner og leggja frá sér óopnaðan pakka með happatreyju. Það er erfitt að svara svo fim­legum rökstuðningi fyrir aðild að ríkjasambandinu. Að mörgu leyti sýnir þetta sérstöðu Íslands. Ástæður ríkja fyrir inngöngu í ESB frá 1958 til 2025 voru að fyrirbyggja stríð milli Frakka og Þjóðverja, síðar að efla innri markaðinn – sem Ísland er nú þegar aðili að – og eftir fall járntjaldsins að festa ríki Mið- og Austur-Evrópu utan áhrifasvæðis Rússa. Árið 2026 koma Íslendingar með nýja vídd inn í þetta ferli: Við gætum mögulega fengið ódýrt stöff og komumst aldrei að því nema kíkja í happatreyjukassann. Helstu rökin gegn inngöngu Íslands eru að við missum yfir­ráð yfir fiskimiðunum og hugsanlega öðrum auðlindum, framseljum vald og þurfum að greiða tugi milljarða á ári til Brussel. Rökin með inngöngu: Ódýrt stöff. Hrafnarnir bíða nú spenntir eftir að Jysk-hreyfingin láti til sín taka í kosningabaráttunni. Huginn og Muninn er einn af ritstjórnardálkum Viðskiptablaðsins.