Val peninga­stefnu­nefndar Seðla­banka Ís­lands mun að mati Kviku standa á milli þess að halda vöxtum óbreyttum og hækka þá um 25 punkta á næsta fundi nefndarinnar 19. ágúst. Nýjasta verðbólgumælingin gefur að mati greiningar­deildar bankans ekki skýrt til­efni til annars hvors kostsins. Vísi­tala neyslu­verðs hækkaði um 0,36% í júlí og ár­s­verðbólga fór úr 5,2% í 5,3%. Mælingin var aðeins yfir spá Kviku, sem gerði ráð fyrir 5,2% verðbólgu. Kvika telur þó lítil tíðindi felast í hækkuninni. Hún skýrist einkum af breyttu vægi ferðaþjónustu í vísitölunni frá fyrra ári en ekki af auknum verðbólguþrýstingi. „Við lesum ekkert í það þótt verðbólgan hafi hækkað um kommu,“ segir í greiningunni. Júlímælingin er sú síðasta sem peninga­stefnu­nefnd fær áður en hún tekur næstu vaxtaákvörðun. Verðbólgan er nú lítil­lega meiri en hún var fyrir síðasta fund nefndarinnar í maí og er nokkurn veginn í samræmi við maí­spá Seðla­bankans. Á móti kemur að þróun sumarsins hefur að mati Kviku dregið úr ótta við að verðhækkanir á hrávörum hafi breiðst út í launa- og verð­myndun hér á landi. Bankinn telur því að nefndar­menn muni ræða af al­vöru hvort rétt sé að bíða með frekari hækkun vaxta. Engu að síður standi ákvörðunin „enn á hnífs­egg“. Peninga­stefnu­nefnd hækkaði vexti sam­tals um 50 punkta í vor. Kvika bendir á að sú hækkun hafi þegar leitt til veru­legrar hækkunar verð­tryggðra grunn­vaxta og þar með aukið aðhald peninga­stefnunnar. Óvissa um endur­skoðun kjara­samninga og þjóðar­at­kvæða­greiðslu um aðildar­viðræður við Evrópu­sam­bandið gæti einnig ýtt undir að nefndin velji að bíða og sjá. Verðbólgan hefur haldist þrálát eftir hækkun hrávöru­verðs vegna átaka í Persaflóa. Fram­lag elds­neytis og flug­far­gjalda til verðbólgunnar hefur aukist um tæp­lega 0,9 pró­sentu­stig frá því átökin hófust. Það eru svo­nefnd fyrstu um­ferðar áhrif: inn­flutt orka og sam­göngur hækka beint í verði. Seðla­bankinn hefur hins vegar einkum haft áhyggjur af annarrar um­ferðar áhrifum, þegar kostnaðar­hækkunin smitast yfir í laun, þjónustu og al­menna verðlagningu fyrir­tækja. Kvika segir engin merki um slíkt hafa komið fram á þeim fimm mánuðum sem liðnir eru frá upp­hafi átakanna. Þvert á móti hafi fram­lag inn­lendra liða til verðbólgu minnkað og mæli­kvarðar á undir­liggjandi verðbólgu al­mennt hjaðnað. Það vegur gegn vaxta­hækkun, þar sem hækkun inn­flutts hrávöru­verðs er erfiðari viðfangs fyrir peninga­stefnuna en al­menn inn­lend eftir­spurnar­verðbólga. Hærri ís­lenskir vextir lækka ekki heims­markaðsverð á olíu, en geta dregið úr hættu á að hækkunin festist í verðbólgu­væntingum og inn­lendri verð­myndun. Olíu­verð gæti ýtt verðbólgunni í 5,8% Júlímælingin breytir ekki grunn­mati Kviku á verðbólgu­horfum. Ný hækkun olíu­verðs eftir að slitnaði upp úr friðar­viðræðum í Persaflóa mun þó lík­lega halda verðbólgunni hærri á næstu mánuðum en áður var talið. Kvika gerir nú ráð fyrir að verðbólga aukist í allt að 5,8% í ágúst. Hún eigi síðan að hjaðna í 5,4% í septem­ber og 5,2% í október. Hækkunin í ágúst skýrist að hluta af grunnáhrifum, lokum sumarút­salna og væntan­legri hækkun elds­neytis­verðs. Þá koma til fram­kvæmda hærri skráningar­gjöld við Háskóla Ís­lands og hærri komu­gjöld í heil­brigðis­kerfinu. Sól­myrkvi í verðmælingar­vikunni kann einnig að hækka verð í ferðaþjónustu tíma­bundið vegna meiri eftir­spurnar eftir flugi og gistingu. Kvika gerir ráð fyrir að þau áhrif gangi að mestu til baka í septem­ber.