Áform Orkusölunnar um að reisa tvær vindmyllur við Lagarfossvirkjun á Héraði hafa vakið úlfúð í nærsamfélaginu. Heimastjórn leggst gegn framkvæmdinni og bændur skora á sveitarfélagið að hafna henni um leyfi. Orkusalan vill reisa tvær vindmyllur við Lagarfossvirkjun á Héraði, allt að 160 m á hæð. Umsagnarfrestur við mat á umhverfisáhrifum rann út fyrir helgi. Landeigendur í grennd við fyrirhugaðar vindmyllur safna nú undirskriftum til að hvetja Múlaþing til að hafna áformum Orkusölunnar. Safna undirskriftum til hvatningar Múlaþings Helga Rún Steinarsdóttir, sauðfjárbóndi á Kirkjubæ sem er í rúmra tveggja km fjarlægð frá Lagarfossvirkjun, stofnaði undirskriftalistann: „Ég vil vera tilbúin með skýra afstöðu þeirra sem búa hérna og nærsamfélagsins þegar Múlaþing fer að taka þetta til sín.“ Í fyrstu hafði Orkusalan hug á því að reisa vindmyllur á Héraðssandi en Fljótsdalshérað féllst ekki á þau áform. Sveitarfélagið sameinaðist síðar þremur öðrum í Múlaþing. Þá lagði Orkusalan til að reisa myllurnar á iðnaðarlóð fyrirtækisins þar sem Lagarfossvirkjun var fyrir. Iðnaðarlóðin umkringd landbúnaðarlandi Kristjana Júníusdóttir, ferðaþjónustubóndi á Ekru sem er tæpum tveimur km frá virkjuninni, bendir á að það sé sérstakt að á iðnaðarlóð séu ekki jafn ríkar skyldur, þrátt fyrir að lóðin sé umkringd landbúnaðarlandi. Aðalskipulag Múlaþings má sjá hér . „Það liggur alveg ljóst fyrir, okkur finnst það alveg galið að setja þetta ofan í landbúnaðarland sem á að njóta þess að vera það sem það er,“ segir Kristjana. Hún bendir á að hún hafi sitt lifibrauð af ferðaþjónustu og selji meðal annars gistingu í sumarhúsum sem eru aðeins um hálfan kílómetra frá virkjunarstað. „Það næði og sá friður og sú náttúruumgjörð sem á að vera í kringum mín hús sé bara einskis virði þegar peningar eru annars vegar.“ Hvað stendur til? Lagarfossvirkjun er á Héraði, norður af Egilsstöðum. Hún er í eigu Orkusölunnar. Þar hefur verið virkjun síðan 1974. Hún var stækkuð 2007 og framleiðir 27,2 MW í dag. Síðustu sex ár hefur Orkusalan kannað möguleika á því að reisa á lóðinni tvær vindmyllur sem gætu framleitt allt að 9,9 MW í viðbót. Vindmyllurnar gætu orðið allt að 160 m háar. Í umhverfismatsskýrslu eru bornir saman möguleikarnir á að reisa 125 eða 160 m háar myllur. Í svari við spurningum fréttastofu sagði forstjóri Orkusölunnar að ekki hafi verið tekin endanleg ákvörðun um hæðina. Hærri myllur gætu framleitt um 30 gígawattstundir á ári en þær lægri aðeins 20 gígawattstundir. Virkjanir undir 10 MW þurfa alla jafna ekki að fara í gegnum rammaáætlun. Árið 2022 ákvað Skipulagsstofnun engu að síður að breyta þyrfti aðalskipulagi og framkvæmdin þyrfti að fara í umhverfismat. Vindmyllurnar fara líklega í rammaáætlun Í sumar var lögum um rammaáætlun breytt svo vindorkumannvirki yfir 30 metrum þurfa öll að fara í gegnum rammaáætlun. Orkusalan telur líklegt að vindmylluáformin á Héraði séu þar með talin. Í skriflegu svari við spurningum fréttastofu bendir Heiða Halldórsdóttir, forstjóri Orkusölunnar, á að í tengslum við verkefnið hafi verið framkvæmdar umfangsmiklar rannsóknir, meðal annars á áhrifum á fuglalíf, gróður, landslag og ásýnd, hljóðvist, útivist og ferðamennsku. Í umsögn heimastjórnar Fljótsdalshéraðs er bent á að vindmyllurnar geti haft neikvæð sjónræn áhrif og áhrif á hljóðvist. Þá skorti ítarlegri upplýsingar um fyrirhugaða flutningsleið og beint samráð við íbúa og hagsmunaaðila. Heiða segir sveitarstjórn Múlaþings hafa verið vel upplýsta um verkefnið og samskipti hafi verið góð. Landeigendur á Héraði skora á sveitarstjórn Múlaþings að hafna áformum um vindmyllur við Lagarfossvirkjun. Virkjunaráformin hafa verið í skipulagsferli hátt í áratug en þurfa nú að fara í gegnum rammaáætlun.