Lögregla var með óvenjufá verkefni miðað við fyrsta dag verslunarmannahelgar. Nóttin var að mestu leyti stórtíðindalaus að undanskildu útkalli Landhelgisgæslunnar í Vestmannaeyjar, þar sem þyrla Gæslunnar sótti mann sem hafði slasast á fæti. Samkvæmt upplýsingum frá lögreglunni í Vestmannaeyjum virðist skemmtanahald um verslunarmannahelgi hafa gengið vel fyrir sig. Lögreglan á Norðurlandi eystra hafði afskipti af þremur vegna ölvunarástands en enginn gisti fangageymslu í nótt. Tvö tilfelli komu upp þar sem lögregla hafði afskipti af börnum sökum áfengisneyslu. Lögreglan á Suðurlandi stöðvaði einn einstakling vegna gruns um akstur undir áhrifum fíkniefna. Grunurinn reyndist á rökum reistur. Magnús Ragnarsson, aðalvarðstjóri hjá Lögreglunni á Suðurlandi, segir umferð hafa gengið óvenjuvel fyrir sig og dreifst vel. Engin alvarleg slys hafi orðið og almennt lítið um útköll.