Olíuverð snerist úr hækkun í lækkun í dag eftir að Scott Bessent, fjármálaráðherra Bandaríkjanna, lýsti yfir bjartsýni um að samkomulag við Íran um opnun Hormússunds gæti náðst strax í dag eða á morgun. „Við eigum í viðræðum við Írana og ég tel að líkur séu á að við getum náð samkomulagi í dag eða á morgun um að opna sundið og færa átökin í eðlilegra horf,“ sagði Bessent í viðtali við CNBC. Heimsmarkaðsverð á olíu hafði hækkað um meira en 2% fyrr í dag vegna óvissu um viðræðurnar en snerist skarpt við eftir ummæli Bessents. Brent-olía lækkaði um 3,7%, í 80,66 Bandaríkjadali á tunnu, en bandarísk WTI-olía lækkaði um 4,5%, í 76,76 dali. Báðar tegundirnar fóru niður í lægsta verð frá 13. júlí. Bessent sagðist hafa séð nokkur skip sigla út um Hormússund að undanförnu. Aðspurður hvort Íran fengi að innheimta gjald af skipum sagði hann að samkomulagið myndi tryggja frjálsa för um sundið. Hann kvaðst búast við að orkuverð lækkaði frekar þegar skipaumferð kæmist aftur í eðlilegt horf. Trú fjárfesta á viðræðunum hafði veikst vegna mótsagnakenndra skilaboða frá Washington og Teheran. Donald Trump Bandaríkjaforseti sagði í gær að viðræður væru hafnar á ný, en írönsk stjórnvöld höfnuðu því að bein samtöl við Bandaríkin stæðu yfir og segjast þess í stað ræða við Óman um opnun siglingaleiða.