Bankarnir eiga meira af verðtryggðum eignum, einkum útlánum, en verðtryggðum skuldum. Þegar verðbólga mælist meiri en gert var ráð fyrir hækka verðbætur á eignunum því meira en á skuldunum og mismunurinn færist til vaxtatekna. Verðtryggingarjöfnuður Arion banka jókst úr 204,7 milljörðum í 235,9 milljarða króna frá áramótum. Bankinn metur að 0,1 prósentustigs frávik mánaðarverðbólgu frá væntingum geti breytt vaxtatekjum hans um 243 milljónir króna. Hjá Íslandsbanka jókst jöfnuðurinn úr 199,6 milljörðum í 231 milljarð. Hjá Landsbankanum lækkaði verðtryggingarjöfnuðurinn úr 298,9 milljörðum króna í 270,3 milljarða. Verðtryggðar eignir drógust lítillega saman á meðan verðtryggðar skuldir jukust og misvægið minnkaði því. Þetta skýrir að hluta hvers vegna hreinar vaxtatekjur bankanna aukast þegar verðbólga reynist þrálátari en búist var við. Tekjurnar eru raunverulegar en ekki endilega innheimtar í reiðufé þegar þær eru færðar. Verðbæturnar leggjast að stórum hluta við höfuðstól verðtryggðra lána og koma því til greiðslu síðar. Jákvæður verðtryggingarjöfnuður er ekki áhættulaus tekjulind. Sama verðbólga og eykur vaxtatekjur bankans hækkar skuldir lántakenda, þrengir að ráðstöfunartekjum þeirra og getur þrýst niður raunvirði trygginga, meðal annars ef fasteignaverð heldur ekki í við verðbólgu. Áhrifin geta því snúist við með tímanum. Verðbólgan styrkir rekstrarreikninginn fyrst en getur síðar aukið líkur á greiðsluerfiðleikum og virðisrýrnun. Sama stærð getur því styrkt afkomuna í dag og aukið útlánaáhættu morgundagsins. Nánar er fjallað um málið í Viðskiptablaðinu . Áskrifendur geta lesið fréttina í heild hér .