Vísitala neysluverðs í Kína hækkaði um 0,5% í júlí samkvæmt tölum frá kínversku hagstofunni. Þetta kemur fram á vef WSJ en hagfræðingar sem miðillinn ræddi við höfðu gert ráð fyrir 0,8% hækkun. Kjarnaverðbólga, sem tekur ekki sveiflukennda liði eins og matvæla- og orkuverð með í reikninginn, mældist 0,9% samanborið við 1% í júní. Kínverska hagstofan segir að minni verðhækkanir á eldsneyti hafi átt stóran þátt í hjöðnun á verðbólgu. Framleiðsluverð hækkaði einnig minna en sérfræðingar bjuggust við en sú vísitala hækkaði um 3,5% milli mánaða. Hagfræðingar spáðu 3,9% hækkun en vísitala framleiðsluverðs hækkaði um 4,1% í júní. Sjá einnig Sprungur farnar að myndast í kínverska hagkerfinu Á sama tíma hefur dregið úr hagvexti í landinu en hagvöxtur í Kína á öðrum ársfjórðungi þessa árs var sá minnsti í rúm þrjú ár. Aukinn vöruútflutningur, meðal annars vegna eftirspurnar eftir gervigreind, hefur ekki dugað til að vega upp á móti veikri innlendri eftirspurn og minnkandi einkaneyslu. Stjórnvöld gáfu til kynna í síðasta mánuði að þau myndu auka ríkisútgjöld til að örva hagkerfið en sérfræðingar segja að nokkrir mánuðir gætu liðið þar til hægt verði að meta áhrif þeirra aðgerða.