Kjarasamningur milli Samtaka atvinnulífsins og Eflingar, Starfsgreinasambands Íslands og Samiðnar var undirritaður þann 7. mars 2024. Endurmat á forsendum fer fram í byrjun september og þarf ársverðbólga að mælast undir 4,7% í ágúst til að forsendur samninganna haldi. Samtök atvinnulífsins (SA), verkalýðshreyfingin og stjórnvöld hafa síðan í maí átt í þríhliða samtali í tengslum við forsendur kjarasamninga. Að sögn Bjarna Benediktssonar, framkvæmdastjóra SA, var eitt af upphaflegum markmiðum að stuðla að því að forsendur kjarasamninga stæðust með því að leita leiða til að hemja verðbólgu. Aftur á móti megi nú segja með nokkurri vissu að útséð sé um að forsenduákvæðið haldi. Spurður um hvort að hann telji líkur á að kjarasamningum verði sagt upp segir Bjarni að lengri tíma kjarasamningar hafi iðulega falið í sér einhvers konar forsenduákvæði, sem hafi ekki alltaf staðist, en sögulega hafi samningum ekki verið sagt upp þegar forsendur bresta. „Aðilar hafa fremur kosið að semja um einhvers konar viðbragð sem tekur á þeim aðstæðum sem uppi eru hverju sinni. Það má því telja líklegra en ekki að svo fari einnig í þetta skiptið.“ „Farsælasta niðurstaðan væri sú að Stöðugleikasamningarnir fengju að renna sitt skeið með þeim hætti sem upphaflega var samið um,“ segir Bjarni. Flestum eigi að vera ljóst að ekki sé svigrúm til frekari launahækkana við þær aðstæður sem nú eru uppi. Fari svo að samningum verði sagt upp segir Bjarni ljóst að það muni skapa frekari óvissu og óstöðugleika í hagkerfi sem glímir nú þegar við krefjandi áskoranir. „Það er erfitt að sjá fyrir sér að slíkar kringumstæður myndu skila auknum ábata fyrir þjóðarbúið þegar upp er staðið. Fyrir aðila vinnumarkaðarins er ekki um annað að ræða en að ná samningum skyldu þeir losna. Spurningin er, hver yrði þá niðurstaðan, með hvaða tilkostnaði og hver yrði ávinningurinn?“ Nánar er fjallað um málið í Viðskiptablaðinu . Áskrifendur geta lesið fréttina í heild hér .