Landskjörstjórn hafa borist fjórar athugasemdir sem varða efnistök kynningarefnis fyrir þjóðaratkvæðagreiðsluna 29. ágúst um hvort Ísland eigi að hefja aðildarviðræður við Evrópusambandið að nýju. Landskjörstjórn hefur gefið út kynningarefni fyrir þjóðaratkvæðagreiðsluna, bæði á vefnum Þjóðaratkvæði.is og í kynningarbæklingum sem er verið að dreifa til allra heimila landsins. Allar athugasemdirnar hafa borist frá einstaklingum. Ástríður Jóhannesdóttir, framkvæmdastjóri Landskjörstjórnar, segir þær af ýmsu tagi. Hún getur ekki rætt efni stakra athugasemda efnislega. „Eitthvað varðar svona túlkun eða ábendingar um að það sé ekki nógu mikið sagt og það er auðvitað eins og oft er þegar er verið að reyna að setja fram skýringar á aðgengilegan hátt að það er kannski ekki hægt að tína allt til,“ segir Ástríður. „Auðvitað er það þannig að málefnið er umdeilt. En kynningarefnið í rauninni stendur fyrir sínu og byggir á traustum heimildum.“ Lagastofnun Háskóla Íslands sá um ritstjórn og vinnslu kynningarefnisins. „Allar efnislegar ábendingar eða athugasemdir eru sendar þeim til umfjöllunar og þar er metið hvort tilefni sé til að breyta efnistökum á kynningarefni,“ segir Ástríður. Fengið alls konar fyrirspurnir Ástríður segir Landskjörstjórn hafa borist fjölmargar fyrirspurnir varðandi þjóðaratkvæðagreiðsluna 29. ágúst. Fólk hefur til dæmis spurst fyrir um atriði eins og framkvæmd atkvæðagreiðslunnar, opnunartíma kjörstaða og hvort það hafi kosningarétt. „Flestar upplýsingar sem fólk þarf á að halda er að finna á Kosning.is, þannig það er gott að fara þar inn,“ segir Ástríður. Það er vert að taka fram að Kosning.is og Þjóðaratkvæði.is eru sami vefur. Landskjörstjórn hafa einnig borist fjöldi almennra spurninga. „Landskjörstjórn leitast við að svara öllum fyrirspurnum eftir bestu getu. Það byggir þá í raun fyrst og fremst á kosningalögunum. En við verðum alveg vör við það að fólk er að velta fyrir sér hvað gerist ef að það verður naumt,“ segir Ástríður. Þá hafa einnig borist spurningar varðandi almenn hugtök sem tengjast atkvæðagreiðslunni eins og hvað meirihluti þýði.