Nær engar skort­stöður virðast nú vera teknar í ís­lenskum ríkis­skulda­bréfum ef marka má stöðu verðbréfalána, sam­kvæmt saman­tekt Markaðsvið­skipta Arion banka á gögnum Seðla­banka Ís­lands. Saman­lagt nafn­virði verðbréfalána í þeim ríkis­skulda­bréfa­flokkum sem fram koma í saman­tektinni var um 1,3 milljarðar króna 14. ágúst. Mest var lánað af RIKS 50 0915, eða um 550 milljónir króna, og RIKS 37 0115, um 410 milljónir. Í öðrum flokkum var staðan enn minni. Þróunin síðustu tólf mánuði er skýr. Viku­legar breytingar á verðbréfalánum voru í fyrra gjarnan á bilinu 8 til 11 milljarðar króna en hafa dregist hratt saman undan­farna mánuði og eru nú aðeins brot af því sem áður var. Verðbréfalán eru meðal annars notuð þegar fjár­festar taka skort­stöðu í skulda­bréfum. Þá fær fjár­festir bréf að láni og selur þau í þeirri von að geta keypt þau aftur síðar á lægra verði og skilað lán­veitandanum. Slík staða gefur þannig til kynna væntingar um verðlækkun bréfa, sem jafn­gildir hækkun ávöxtunar­kröfu. Lítil staða verðbréfalána bendir því til þess að fáir markaðsaðilar séu um þessar mundir til­búnir að veðja með af­gerandi hætti á frekari verðlækkun ís­lenskra ríkis­skulda­bréfa. Það þarf þó ekki að þýða að markaðurinn búist við lækkandi vöxtum þegar í stað. Lítil skort­staða getur einnig endur­speglað litla áhættusækni, kostnað við að halda slíkum stöðum eða ein­fald­lega að fjár­festar telji núverandi ávöxtunar­kröfu þegar endur­spegla tals­verða óvissu um þróun vaxta.