Bryndís Haralds­dóttir þing­maður Sjálf­stæðis­flokksins segir að aðild að Evrópu­sam­bandinu leysi ekki þann vanda sem ríkis­stjórnin hafi skapað með eigin ákvörðunum í skatta- og gjalda­málum. Hún vísar þar til ákvörðunar peninga­stefnu­nefndar Seðla­banka Ís­lands í morgun um að hækka megin­vexti um 0,25 pró­sentur í 8%. „Aðildar­samningur við ESB leysir EKKI vandann sem ríkis­stjórnin hefur búið til með eigin ákvörðunum,“ skrifar Bryndís í færslu á sam­félags­miðlum. Hún segir reikninginn fyrir efna­hags­stjórn ríkis­stjórnarinnar nú sendan beint á heimilin. „Þegar þessi ríkis­stjórn tók við hafði verðbólga minnkað og vaxtalækkunar­ferlið var hafið. Síðan hefur ríkis­stjórninni tekist að snúa þróuninni við og bæði verðbólga og vextir tekið að hækka á ný,“ skrifar Bryndís. Mynd sem Bryndís deildi með færslu sinni. Hún segir ríkis­stjórnina vita­skuld ekki bera ábyrgð á stríðsátökum er­lendis en annað gildi um ákvarðanir hennar hér heima. „Hún ber fulla ábyrgð á eigin skatta- og gjalda­hækkunum. Af­leiðingarnar birtast nú í þyngri vaxta­byrði heimila og fyrir­tækja.“ Opin­ber gjöld meðal helstu áhrifa Bryndís vísar til nýrra Peninga­mála Seðla­bankans sem birt voru sam­hliða vaxtaákvörðuninni. Þar segir bankinn að verðbólga hafi verið yfir 5% það sem af er ári og að hún hafi mælst 5,3% í júlí. Bankinn gerir ráð fyrir að verðbólga aukist enn á næstu mánuðum áður en hún taki að hjaðna á næsta ári. „Aukning mældrar verðbólgu hefur fyrst og fremst litast af hækkun opin­berra gjalda og áhrifum stríðsá­taka í Mið-Austur­löndum,“ segir í Peninga­málum. Sjá einnig Aukin verðbólga „fyrst og fremst“ vegna hækkunar opin­berra gjalda Frekari opin­berar verðhækkanir eru jafn­framt fram undan. Seðla­bankinn nefnir meðal annars fyrir­hugaðar hækkanir á gjöldum fyrir heil­brigðisþjónustu og skráningar­gjöldum við Háskóla Ís­lands. Þá renna tíma­bundnar að­gerðir stjórn­valda vegna elds­neytis út í septem­ber þegar virðis­auka­skattur á elds­neyti hækkar á ný. Á sama tíma segir Seðla­bankinn að vöru­verð hafi lítið hækkað undan­farið. Verð á mat­vöru hafi nánast staðið í stað frá því í mars, að undan­skilinni hækkun á mjólkur­vörum í júní. Árs­hækkun mat­vöru­verðs var 3,9% í júlí, saman­borið við 5,8% í mars. Segir lausnina þurfa að finna hér heima Bryndís gagn­rýnir jafn­framt að staðan í verðbólgu- og vaxta­málum sé notuð sem rök­semd fyrir aðild Ís­lands að Evrópu­sam­bandinu. Hún segir hvorki vexti né verðlag vera viðfangs­efni sem samið sé um í aðildar­viðræðum. „Verk­efnið er og verður okkar að leysa – hér heima. Við getum þetta sjálf, við verðum að leysa það sjálf, og árin 2014–2020 sýna að það er hægt,“ skrifar hún. Færslunni lýkur með þeim orðum að stjórn­völd eigi fremur að beina kröftum sínum að efna­hags­málunum innan­lands. „Tökum til heima og eyðum ekki dýr­mætum tíma í könnunar­leiðangur til Brussel.“