Ásdís Kristjánsdóttir, bæjarstjóri Kópavogs, gagnrýnir ríkisstjórnina harðlega í kjölfar nýjustu vaxtahækkunar Seðlabanka Íslands og segir þróun verðbólgu og vaxta hafa orðið þvert á þau markmið sem ríkisstjórnin hafi lagt upp með. Hún bendir jafnframt á að Seðlabankinn hafi sjálfur dregið fram þátt hins opinbera í verðbólguþróuninni. Viðskiptablaðið greindi frá því fyrr í dag að samkvæmt mati bankans megi aukna verðbólgu fyrst og fremst rekja til hækkunar opinberra gjalda. Þá hefur Seðlabankinn einnig bent á að launa- og verðhækkanir hafi verið mestar hjá hinu opinbera. Sjá einnig Aukin verðbólga „fyrst og fremst“ vegna hækkunar opin­berra gjalda Ásdís segir ríkisstjórn Kristrúnar Frostadóttur hafa verið kosna til að stuðla að lægri verðbólgu og vöxtum. Sjá einnig Launa- og verðhækkanir mestar hjá hinu opin­bera „Hvorugt hefur gerst, verðbólga hefur aukist og vextir hækkað frá því ríkisstjórnin tók við – þvert á yfirlýsingar forsætisráðherra um annað,“ segir hún. Kópavogur takmarkaði hækkanir Ásdís segir Kópavog hafa reynt að leggja sitt af mörkum með því að halda aftur af gjaldskrárhækkunum. „Kópavogur steig þau skref í vor að takmarka gjaldskrárhækkanir á barnafjölskyldur við 2,5% á árinu 2026. Með þessum aðgerðum var Kópavogur að leggja sitt af mörkum til að ná tökum á verðbólgunni og um leið standa vörð um ráðstöfunartekjur barnafjölskyldna í Kópavogi,“ segir Ásdís. Hún telur að ríkisstjórnin eigi að fylgja sama fordæmi. „Það væri óskandi ef ríkisstjórnin myndi stíga fram með góðu fordæmi enda mikið í húfi fyrir íslenskt samfélag,“ segir Ásdís.