Fyrrverandi eiginkonu eins ákærða í Reykholtsmálinu var í dag gert að mæta fyrir dómstóla í eigin persónu í stað þess að gefa skýrslu í gegnum fjarfundarbúnað. Konan var byrjuð á skýrslu sinni en stuttu eftir það heyrðu saksóknari í málinu og dómari í ákærða í íbúð konunnar. Fimm karlar og ein kona, sem öll eru Íslendingar, eru ákærð fyrir sérstaklega hættulega og stórfellda líkamsárás, frelsissviptingu, ólögmæta nauðung og rán á heimili mannsins í Reykholti í Bláskógabyggð fyrir tveimur árum. Konan sem átti að gefa skýrslu í gegnum fjarfundarbúnað er fyrrverandi eiginkona manns sem er tengdafaðir Andra Más Mortensen Birgissonar. Hann er einnig faðir Ingunnar Rutar Sigurðardóttur sem er einnig ákærð í málinu og játaði sinn þátt í málinu í gær. Dómari sagði það ekki til umræðu hvort vitnisburðurinn fengi að halda áfram. Konan yrði að mæta í eigin persónu fyrir dóm síðar í dag. Konan sagði í fyrstu að hún væri ein í íbúðinni en viðurkenndi síðar að ákærði væri á salerni íbúðarinnar.