Volodymyr Zelensky forseti Úkraínu er ekki sammála fyrrverandi samráðherra sínum um að rétt sé að boða til kosninga sem fyrst. Slíkt væri aðeins rétt ef það væri vilji til að eyðileggja þjóðina. Mykhailo Fedorov, sem Zelensky rak úr embætti varnarmálaráðherra, krafðist þess í síðustu viku að boðað yrði til kosninga. Nokkur hundruð manns kröfðust svo þess sama í mótmælum. Fedorov naut mikilla vinsælda sem varnarmálaráðherra og því var brottrekstur hans mjög umdeildur. Úkraína er nú undir herlögum og samkvæmt stjórnarskránni má ekki halda kosningar á meðan. Sú ráðstöfun nýtur enn stuðnings meðal mikils meirihluta landsmanna. Zelensky sagði í samtali við fjölmiðla, sem var birt í morgun, að í stríði eins og þessu væri það mikil áhætta að halda kosningar. Þær skapi ákveðna holskeflu sem geti klofið þjóðina. „Ef við viljum eyðileggja landið þá viljum við fara í kosningar á þessum stríðstímum,“ sagði hann. Fedorov hefur hins vegar haldið áfram gagnrýnum málflutningi sínum, þó að hann hafi ekki beinst beint að Zelensky. Hann sagði í viðtali við breska ríkisútvarpið að Zelensky þyrfti að svara spurningum um spillingu í ríkisstjórn sinni. Þessi ummæli eru til komin vegna tilkynningar í síðustu viku um að peningaþvættisrannsókn væri hafin á nokkrum þingmönnum og bankastarfsmönnum. Hún varð til þess að hátt settur embættismaður á skrifstofu Zelenskys var rekinn. Fedorov segir þetta vekja spurningar um hversu vel Zelensky geri sér grein fyrir mögulegri spillingu í hans innsta hring. Hann tók þó fram að sjálfur hefði hann aldrei orðið var við að Zelensky hefði farið á svig við lög. 13 voru drepnir í árásum bæði Rússa og Úkraínumanna í fyrrinótt – fjórir í Rússlandi og níu í Úkraínu, þar af tveir á Krímskaga sem Rússar innlimuðu á ólögmætan hátt fyrir 12 árum.