Dómsmálaráðherra vill efla samhæfingu stofnana í baráttunni gegn mansali með nýrri aðgerðaáætlun sem hefur verið birt í samráðsgátt stjórnvalda. Markmiðið er að auka samstarf og skýra boðleiðir, ekki síst þegar kemur að börnum sem þolendum mansals. Stuðla á að markvissari fræðslu meðal fagfólks um mansal og hvernig bregðast megi við þegar grunur leikur á að einstaklingur sé þolandi mansals. Þá verður sérstaklega stuðlað að fræðslu og færniuppbyggingu meðal lögreglu og annarra innan réttarvörslukerfisins með það að markmiði að þannig fjölgi málum til rannsóknar og dómum yfir gerendum mansals. Nær öll skráð mansalsmál á Íslandi varða kynferðislega hagnýtingu eða nauðungarvinnu, samkvæmt gögnum Bjarkarhlíðar. Kynjahlutföll þolenda mansals sem leitað hafi til Bjarkarhlíðar séu nánast jöfn þó að brotaþolar í vændismansalsmálum séu í öllum tilfellum konur. Vændi virðist mun algengara en opinber tölfræði gefi til kynna. Tölfræðin nær ekki til barna sem þolenda mansals því að Bjarkarhlíð hefur ekki komið að þeim málum. Vinnumansalsmál tengist einkum byggingariðnaði, veitingageiranum, ýmsum þjónustustörfum og snyrtistofum. „Þá séu einnig dæmi um að þolendur sem leitað hafi til Bjarkarhlíðar hefðu verið þvingaðir í afbrot sem gerandi hagnaðist á, svo sem innbrot, þjófnað eða fíkniefnainnflutning, samhliða því að vera neyddir í vændi.“