Niðurstöður sameiginlegs uppsjávarleiðangurs Íslendinga, Færeyinga, Norðmanna og Dana í sumar eru að útbreiðsla makríls við Ísland er álíka og í fyrra og þéttleiki ívið meiri. Ekkert mældist af makríl fyrir vestan og sunnan landið líkt og síðan 2023. Hækkun frá lægstu mælingu sem var 2025 Þetta kemur fram á vef Hafrannsóknastofnunar. Þar segir að vísitala lífmassa makríls hafi verið metin 1,80 milljón tonn sem sé ríflega 9 prósent hækkun frá árinu 2025. Á því ári hafi mælst minnsti lífmassi síðan 2007. Enn mældist ekkert af makríl fyrir vestan og sunnan land „Ekkert mældist af makríl fyrir vestan og sunnan landið líkt og verið hefur síðan sumarið 2023. Líkt og undanfarin ár var meiri hluti stofnsins í Noregshafi og þá sérstaklega suðaustan til og í norðurhluta Norðursjó, sem er breyting frá fyrri árum,“ segir á vef Hafrannsóknastofnunar. Leiðangurssvæðið 2,2 milljón ferkílómetrar „Meginmarkmið þessa árlega leiðangurs var að meta magn uppsjávarfiska í Norðaustur-Atlantshafi að sumarlagi en jafnframt að rannsaka vistkerfi og umhverfi sjávar. Leiðangurssvæðið var 2,2 milljón ferkílómetrar sem er tæplega 6 prósent minna en síðasta ár þar sem yfirferð skipa fyrir vestan Ísland og í norður Noregshafi var minni en undanfarin ár vegna samdráttar í útbreiðslu makríls,“ segir áfram. Aukningin í kolmunna einkum eins og tveggja ára fiskur Þá kemur fram að vísitala fyrir lífmassa kolmunna út frá bergmálsmælingum hafi verið metin tæplega 2,8 milljón tonn sem sé tæplega 14 prósent aukning frá 2025. „Var það einkum eins og tveggja ára kolmunni (35 prósent og 22 prósent af lífmassanum). Vísitala fyrir lífmassa síldar út frá bergmálsmælingum var metin tæplega 5.9 milljón tonn sem er ríflega 28 prósent hærra en á síðasta ári. Árgangar frá 2021 og 2016 (5 og 10 ára) vorum mest áberandi en hvor um sig vóg um 28 prósent af heildarlífmassanum.“ Nánar er fjallað um þessar bráðabirgðaniðurstöður leiðangursins á vef Hafrannsóknastofnunar og skýrslu má nálgast hér.