Nýr meirihluti í borgarstjórn ætlar sér að ná árangri. Við settum okkur skýran verkefnalista og höfum nú lokið við öll þau verkefni sem við ætluðum okkur að klára á fyrstu 100 dögunum. Verkefnin fram undan eru fjölmörg - en fyrstu hundrað dagarnir sýna að við munum ekki hika við að taka á erfiðum málum strax. Sjálfbærni í rekstri Við höfum sett okkur það metnaðarfulla en sjálfsagða markmið að ná sjálfbærni í rekstri Reykjavíkurborgar. Í gegnum árin hefur viðstöðulausum hallarekstri verið bjargað fyrir horn með eignasölu og arðgreiðslum úr Orkuveitu Reykjavíkur. Við ætlum að vinda ofan af þeirri þróun og tryggja til framtíðar að reglubundnar skatttekjur dugi fyrir reglulegum útgjöldum. Það eru blikur á lofti. Verðbólga hefur reynst þrálátari en spár gerðu ráð fyrir, atvinnuleysi fer vaxandi og byggingamarkaðurinn hefur kólnað verulega. Ef jafnvægi á að nást í rekstri borgarinnar þarf raunverulegt aðhald og áþreifanlegar aðgerðir. Við höfum ekki látið bíða eftir okkur. Á fyrstu 100 dögunum höfum við ráðist í skipulagsbreytingar á skrifstofu borgarstjóra, velferðarsviði og skóla- og frístundasviði. Markmiðið í öllum tilvikum var að draga úr yfirbyggingu, stytta boðleiðir og tryggja liprari stjórnsýslu – en standa vörð um grunnþjónustu við íbúa. Áætlað er að aðgerðirnar skili 1,2 milljörðum í hagræðingu árlega – það er þó einungis brot af þeirri hagræðingu sem mun reynast nauðsynleg ef bregðast á við fyrirséðum hallarekstri. Verkefninu er því sannarlega ekki lokið. Meira frelsi á húsnæðismarkaði Kólnun á byggingarmarkaði er verulegt áhyggjuefni og nauðsynlegt að sveitarfélög bregðist við með ábyrgum hætti. Undanliðin ár hefur borgin sett margvíslegar kvaðir á byggingariðnað sem hægt hafa á uppbyggingu og hækkað húsnæðisverð. Þessu ætlum við að vinda ofan af. Á fyrstu 100 dögunum höfum við þegar einfaldað regluverk borgarinnar og afnumið íþyngjandi kvaðir á byggingariðnað. Í stað stífra hlutfallsviðmiða um stærðir og herbergjafjölda íbúða fá uppbyggingaraðilar nú aukið svigrúm til að aðlaga íbúðasamsetningu að raunverulegri markaðseftirspurn, enda geta stífar reglur hamlað eðlilegu viðbragði við þörfum markaðarins. Sama hugsun liggur að baki tillögum um verslunar- og þjónusturými á jarðhæðum, þar sem kröfur um atvinnustarfsemi verða framvegis einungis bundnar við staði þar sem eftirspurn og skipulagsmarkmið réttlæta þær, í stað þess að þær gildi undantekningalaust á öllum jarðhæðum. Við viljum tryggja aukið frelsi á húsnæðismarkaði og gera byggingariðnaði kleift að byggja íbúðir sem eftirspurn er eftir. Á næstu mánuðum hyggjumst við stórauka lóðaframboð, einfalda regluverk enn frekar, tryggja liprari stjórnsýslu og þjónustuvætt borgarkerfi. Aukinn sveigjanleiki í bílastæðamálum Bílastæðamál í höfuðborginni hafa lengi vakið óánægju íbúa. Við hétum því að kollvarpa bílastæðastefnu fyrri meirihluta, tryggja aukinn sveigjanleika og regluverk sem samræmist þörfum íbúa. Við höfum nú stórlækkað gatnagerðargjald af bílastæðum neðanjarðar í fjölbýli, en 90% afsláttur er nú veittur af gjaldinu. Við höfum tryggt stóraukinn sveigjanleika hvað varðar fjölda bílastæða við nýbyggingar. Við erum byrjuð að fjarlægja aðskotahluti úr bílastæðum í miðborg og höfum jafnframt stytt gjaldskyldutíma bílastæða en framundan er enn frekari endurskoðun á gjaldtökunni þar sem tryggt verður samráð við bæði íbúa og atvinnurekendur á svæðinu. Loks höfum við tryggt að bílastæðahús verði opin allan sólarhringinn og öryggi í húsunum bætt með lýsingu, öryggismyndavélum og eftirliti. Skólamál í forgrunni Nýlegar niðurstöður PISA gefa tilefni til viðbragða. Alltof lengi hefur íslensku skólakerfi hrakað milli mælinga. Nú er kominn tími til að snúa þróuninni við – stefna að því að koma íslensku skólakerfi í fremstu röð – vinna með mælanleg markmið og gera kröfu um árangur. Nýr meirihluti hefur ákveðið að samræmdur matsferill verði lagður fyrir alla árganga grunnskólans árlega. Niðurstöðum verður fylgt markvisst eftir með aðgerðum með það að markmiði að árangur batni ár frá ári. Við gerum kröfu um að hlutfall nemenda sem nær væntri námsframvindu hækki ár hvert á hverju skólastigi, og að nemendum undir hæfniviðmiðum í lesskilningi, lesfimi og stærðfræði fækki markvisst árlega, óháð félagslegri stöðu. Við hyggjumst jafnframt mæla með markvissum hætti áhrif af símafríi í grunnskólum en margt bendir til þess að snjalltæki hafi neikvæð áhrif á líðan og námsframvindu barna. Á sumarmánuðum undirrituðum við svo samstarfssamning við Velferðarsjóð barna og Heimili og skóla um heimanámsaðstoð sem mun bjóðast öllum grunnskólabörnum í Reykjavík á bókasöfnum borgarinnar. Við erum rétt að byrja Nú þegar fyrstu 100 dagarnir renna sitt skeið og verkefnalistinn hefur verið uppfylltur er tímabært að líta til þeirra verkefna sem við höfum heitið að ljúka á fyrstu 12 mánuðum kjörtímabilsins. Það er verk að vinna – og við erum rétt að byrja. Höfundur er borgarstjóri Reykjavíkur.