Hluta­bréf í Amaroq Minerals lækkuðu um tæp 7% í Kaup­höll Ís­lands í dag eftir að félagið birti árs­upp­gjör sitt fyrir opnun markaða í morgun. Bréf félagsins stóðu í 154 krónum við lokun eftir um 18 milljóna króna veltu. Sam­kvæmt upp­gjörinu námu tekjur Amarqo 27 milljónum kana­da­dala í tekjur á árinu 2025, fyrsta árinu með veru­legar tekjur af gullsölu frá Nalunaq-námunni á Suður-Græn­landi. Félagið tapaði þó 18,6 milljónum dala en stjórn­endur sögðu árið hafa verið mjög árangurs­ríkt, fram­leiðslu­mark­mið hefðu náðst og stefnt væri að 25 til 35 þúsund únsum af gulli á þessu ári. Jafn­framt var greint frá fyrir­hugaðri stækkun lána­línu úr 35 í 70 milljónir Bandaríkja­dala. Hluta­bréfa­verð Hampiðjunnar lækkaði um tæp 3% í 86,5 krónur og velta nam um 23 milljónum króna. Bréf Icelandair lækkuðu um tæp 2% í 0,72 krónur í um 19 milljóna króna við­skiptum. Þá lækkaði hluta­bréfa­verð Skeljar um rúm 1,2% í 16 krónur en velta var um 2 milljónir króna. Hluta­bréfa­verð Arion banka lækkaði um rúm 1,1% í 177,5 krónur og velta í bréfunum nam um 242 milljónum króna. Bréf Haga lækkuðu um tæpt 1% í 114 krónur, í um 27 milljóna króna veltu, og hluta­bréfa­verð Ocu­lis lækkaði um 0,8% í 3.095 krónur í um 7 milljóna króna við­skiptum. Hluta­bréfa­verð Kald­víkur lækkaði einnig um tæpt 0,8% í 25,6 krónur, en velta nam um 2 milljónum króna. Mest velta var í Ís­lands­banka, þar sem við­skipti námu um 444 milljónum króna. Hluta­bréfa­verð bankans lækkaði um tæpt 0,8% í 133,5 krónur. Úr­vals­vísi­talan OMXI15 lækkaði um 0,44% og var heildar­velta 1,6 milljarðar.