Breski auðkýfingurinn Chris Rokos, aðaleigandi breska vogunarsjóðsin Rokos Capital Management, hefur heitið því að gefa 190 milljónir punda, eða sem nemur 31,4 milljörðum króna til Cambridge háskólans, samkvæmt frétt Financial Times . Þetta er stærsta einstaka fjárframlag sem breskur háskóli hefur fengið. Fyrra met tilheyrði Stephen Schwarzman, forstjóra Blackstone, sem hefur veitti Oxford-háskólanum framlag að fjárhæð 185 milljónir punda. Stærsta einstaka gjöf sem Cambridge hefur þegið á síðari tímum var áður 100 milljóna punda framlag frá fjárfestinum David Harding árið 2019. Stofna nýjan skóla Framlag Rokos mun fela í sér greiðslu upp á 130 milljónir punda sem verður varið í stofnun nýs skóla sem býður upp á nám í opinberri stjórnsýslu í Cambridge West hverfinu. Rokos hefur jafnframt skuldbundið sig til frekara framlags upp á allt að 60 milljónir punda. Sjá einnig Greiðir sjálfum sér 81 milljarð eftir öflugt ár Cambridge-háskóli sagði að hinn nýi Rokos School of Government muni einblína á samspil stefnumótunar stjórnvalda og nýrrar tækni og vísinda í „flóknum heimi kerfislægra breytinga“. Skólinn mun ráða fræðimenn á sviði stjórnmálafræði, hagfræði og vísinda, auk sérfræðinga úr stjórnsýslu og atvinnulífi. Hann mun fjármagna fræðistörf 80-80 doktorsnema á fyrstu 10 árum sínum. Chris Rokos, fyrrverandi nemandi við Oxford-háskóla og Eton, hefur fest sig í sessi sem einn þekktasti fjárfestir heims sem tekur stöður út frá alþjóðlegum straumum í viðskiptum og efnahagsmálum (e. macro trader). Hann hefur tekið stórar stöður byggðar á efnahagslegum þáttum á borð við vexti, hagvöxt og verðbólgu, meðal annars í gegnum skuldabréf og hlutabréf. Hann stofnaði 22 milljarða dala vogunarsjóðinn sinn, Rokos Capital Management, árið 2015 og kom áður að stofnun vogunarsjóðsins Brevan Howard. Rokos sagði að eftir að hafa notið góðs af þeirri menntun sem hann fékk vilji hann nú „gefa eitthvað til baka til Bretlands“. Hann sagðist jafnframt vonast til að stjórnmálaskólinn muni styrkja „mjúkt vald“ (e. „soft power“) Bretlands.