Elon Musk tapaði dóms­máli sínu gegn Sam Alt­man og OpenAI eftir aðeins um tveggja klukku­stunda um­fjöllun kviðdóms í Kali­forníu. Níu manna kviðdómur komst ein­róma að þeirri niður­stöðu að kröfur Musks hefðu verið settar fram eftir að lög­bundinn fyrningar­frestur var liðinn. Dómarinn Yvonne Gonza­lez Rogers sagðist fallast á niður­stöðuna. Málið hefur varpað skugga á áform OpenAI um skráningu á markað, en niður­staðan er stór sigur fyrir Alt­man og OpenAI. Musk sagðist eftir niður­stöðuna ætla að áfrýja málinu. Musk höfðaði málið árið 2024 og sakaði Alt­man, Greg Brock­man og OpenAI um að hafa svikið upp­haf­legt mark­mið félagsins. OpenAI var stofnað árið 2015 sem félag sem átti að þróa gervi­greind til hags­bóta fyrir mann­kynið, en Musk hélt því fram að stjórn­endur félagsins hefðu breytt því í hagnaðar­drifið fyrir­tæki í trássi við það mark­mið. Við­skipta­blaðið fjallaði fyrr í dag um málið og rifjaði upp að Musk og Alt­man komu báðir að stofnun OpenAI. Musk lagði sam­kvæmt Financial Times 38 milljónir dala til félagsins áður en hann yfir­gaf það árið 2018 eftir valda­baráttu innan þess. Sjá einnig Ör­lög eins stærsta frumút­boðs sögunnar í höndum kviðdóms Musk krafðist þess meðal annars að OpenAI yrði gert að greiða skaða­bætur upp á 134 milljarða dala, að Alt­man og Brock­man yrðu fjar­lægðir úr stjórn félagsins og að um­breyting OpenAI yfir í hagnaðar­drifið félag yrði gengin til baka. Lög­menn OpenAI sögðu málið hins vegar til­hæfu­laust og héldu því fram að það væri liður í sam­keppni Musks við OpenAI eftir að hann stofnaði eigið gervi­greindar­fyrir­tæki, xAI, árið 2023. Þeir bentu einnig á að xAI væri sjálft hagnaðar­drifið félag, þótt Musk hefði haldið því fram að öflug gervi­greind ætti að vera í höndum óhagnaðar­drifins félags. Í málinu var deilt um það hvenær Musk hefði getað vitað að OpenAI stefndi í átt að hagnaðar­drifnu fyrir­komu­lagi. Lög­menn Musks héldu því fram að Alt­man og Brock­man hefðu falið fyrir honum áform sín og að hann hefði fyrst áttað sig á brotinu árið 2022, þegar fréttir bárust af fyrir­hugaðri stór­fjár­festingu Micros­oft í OpenAI. Kviðdómurinn féllst ekki á það. Hann hafnaði því að Musk hefði verið ókunnugt um stefnu OpenAI fyrir árið 2022 og taldi kröfur hans því fyrndar. Dómarinn samþykkti niður­stöðuna og vísaði frá kröfum Musks um brot á góð­gerðar­skyldum og órétt­mæta auðgun. Réttar­höldin stóðu yfir í um mánuð og leiddu í ljós ýmis innri sam­skipti og átök innan OpenAI á þeim árum þegar félagið breyttist úr litlu rannsóknarfélagi yfir í eitt verðmætasta gervi­greindar­fyrir­tæki heims. Financial Times segir að réttar­höldin hafi meðal annars varpað ljósi á um­ræðu innan OpenAI árið 2017 og 2018 um hvernig félagið ætti að fjár­magna vöxt sinn og hvernig það gæti keppt við stærstu tækni­fyrir­tæki heims. Þá hafi einnig verið fjallað um brott­rekstur Altmans árið 2023, þegar stjórn OpenAI vék honum tíma­bundið frá störfum áður en hann var fljót­lega endur­ráðinn. Þótt OpenAI hafi unnið laga­legan sigur hefur málið verið félaginu kostnaðar­samt og óþægi­legt. Innri sam­skipti stjórn­enda hafa verið gerð opin­ber og trúverðug­leiki bæði Musks og stjórn­enda OpenAI var dreginn í efa við réttar­höldin. Niður­staðan fjar­lægir þó eina stærstu laga­legu hindrunina sem staðið hefur í vegi fyrir næstu skrefum OpenAI. Félagið hefur unnið að því að breyta skipu­lagi sínu þannig að það geti betur aflað þess fjár­magns sem þarf til að keppa við stærstu tækni­fyrir­tæki heims í þróun gervi­greindar. Það fyrir­komu­lag er þó áfram undir eftir­liti bandarískra yfir­valda.