Þórður Þórarins­son, fyrr­verandi fram­kvæmda­stjóri Sjálf­stæðis­flokksins, verður næsti bæjar­stjóri Hafnar­fjarðar. Þetta kemur fram í til­kynningu Sjálf­stæðis­flokksins í Hafnarfirði í dag, þar sem farið er yfir áherslur nýs sam­starfssátt­mála meiri­hlutans í bænum. Í til­kynningunni segir að sjálf­stæðis­stefnan sé „áberandi“ í nýjum sam­starfssátt­mála meiri­hlutans, þar sem ábyrg fjár­mál, frelsi ein­stak­linga og öflugt at­vinnulíf séu í for­grunni. Þar segir jafn­framt að sam­komu­lagið byggi á traustum rekstri sveitarfélagsins, ein­faldari stjórnsýslu og aukinni skil­virkni án þjónustu­skerðinga. Sam­kvæmt til­kynningunni verður útsvar ekki hækkað á kjörtíma­bilinu og fast­eigna­gjöld munu ekki hækka um­fram verðlag. Þá verður ráðist í rekstrar- og stjórnsýsluút­tekt til að tryggja betri nýtingu fjár­muna bæjar­búa. Í sam­starfssátt­málanum verður einnig lögð sér­stök áhersla á fjöl­skyldur og aukið val­frelsi, meðal annars með hækkun heima­greiðslna og auknum stuðningi við dag­for­eldra. Sjálf­stætt starfandi leik- og grunnskólar fái áfram stuðning og unnið verði að því að ein­falda dag­legt líf fjöl­skyldna. Þá segir í til­kynningunni að at­vinnulíf og verðmæta­sköpun verði sett í önd­vegi. Það verði gert með því að halda álögum á fyrir­tæki í lág­marki, tryggja lóða­fram­boð og bæta þjónustu við fyrir­tæki og frum­kvöðla. Áhersla verði einnig lögð á öflugt skipu­lag, upp­byggingu inn­viða og ábyrga stefnu í mál­efnum hælis­leit­enda með hags­muni bæjar­búa að leiðar­ljósi. Til­kynningin endar á því að nýr bæjar­stjóri Hafnar­fjarðar verði Þórður Þórarins­son.