Danske Bank ætlar að leggja niður 262 stöður í tengslum við skipu­lags­breytingar hjá bankanum. Þetta kemur fram í til­kynningu frá bankanum, að því er Børsen greinir frá. Langstærstur hluti stöðu­gildanna, eða 199, er í Dan­mörku. Karsten Breum, mann­auðs­stjóri Danske Bank, segir í til­kynningu að ákvörðunin sé erfið. Breytingarnar skýrist af auknum breytinga­hraða og breyttri þörf fyrir hæfni innan bankans. „Þegar um­hverfi okkar, fjár­mála­geirinn og tæknin halda áfram að breytast, aðlögum við skipu­lagið stöðugt til að tryggja að við höfum rétta hæfni og nauð­syn­lega getu til staðar,“ segir Breum. Stöðu­gildin sem lögð verða niður eru víða í skipu­lagi bankans, þar á meðal í starf­semi sem snýr að ein­stak­lingum í Dan­mörku. Danske Bank segir að bankinn hafi náð veru­legri hag­ræðingu á síðasta ári með stafrænum lausnum og gervi­greind. Á sama tíma sé hegðun við­skipta­vina að verða sí­fellt stafrænni. Ákvörðunin hefur vakið hörð viðbrögð hjá Finans­for­bundet, stéttarfélagi fjár­málafólks í Dan­mörku. Kirsten Ebbe Brich, for­maður félagsins hjá Danske Bank, segist von­svikin yfir ákvörðuninni, ekki síst í ljósi góðrar af­komu bankans. „Á góðum efna­hags­tímum fyrir bankann er ég svekkt og von­svikin yfir því að Danske Bank telji nauð­syn­legt að ráðast í svo um­fangs­miklar upp­sagnir, aðeins þremur mánuðum eftir sam­bæri­lega að­gerð,“ segir hún. Dor­rit Brandt, for­maður Finans­for­bundet, varar við því að niður­skurðurinn geti aukið álag á starfs­fólkið sem eftir stendur. Hún segir ein­hliða áherslu á kostnaðar­lækkanir ekki skila árangri til lengri tíma. „Við viljum vara mjög ein­dregið við hættunni á neikvæðri hringrás með lakari lausnum, fleiri mistökum, auknu álagi á starfs­fólk og veikara trausti við­skipta­vina,“ segir Brandt. Danske Bank er stærsti banki Dan­merkur og er með meira en 20 þúsund starfs­menn. Bankinn starfar einnig annars staðar á Norður­löndum, í Litáen, Póllandi og Bret­landi.