Frekari samþjöppun gæti verið fram undan á norrænum banka­markaði. For­stjórar Nor­dea og Danske Bank segjast báðir opnir fyrir yfir­tökum og fylgjast með tækifærum sem kunna að koma upp á Norður­löndum. Frank Vang-Jen­sen, for­stjóri Nor­dea, gekk lengst í sam­tali við fjár­festa og grein­endur eftir birtingu upp­gjörs bankans á fimmtu­dag. Hann sagði Nor­dea reiðu­búið að skoða yfir­tökur ef réttu tækifærin kæmu upp. „Við myndum fagna yfir­tökutækifærum ef þau kæmu upp. En það sem við höfum áhuga á að kaupa er ekki til sölu,“ sagði Vang-Jen­sen á síma­fundi með fjár­festum, sam­kvæmt Børsen. Hann bætti við að Nor­dea væri að skoða nokkur tækifæri á Norður­löndum. „Það eru nokkur norræn tækifæri sem við erum að vinna með með virkum hætti,“ sagði hann. Carsten Egeriis, for­stjóri Danske Bank, segir bankann ekki vera með neitt ákveðið í far­vatninu eins og staðan er núna. Hann segir þó að bankinn fylgist stöðugt með markaðnum. „Við fylgjumst stöðugt með markaðnum og skoðum hvaða tækifæri eru til staðar,“ segir Egeriis við Børsen. Danske Bank starfar, auk Dan­merkur, í Noregi, Finn­landi, Norður-Ír­landi og Svíþjóð. Egeriis segir bankann fyrst og fremst horfa til innri vaxtar, en að yfir­tökur komi til greina ef áhuga­verð tækifæri skapist. „Svíþjóð er aug­ljós kostur, sér­stak­lega með hlið­sjón af stærð okkar í einkabankaþjónustu,“ segir hann. Danske Bank er til­tölu­lega lítill leikandi á sænska banka­markaðnum. Egeriis segir mögu­legar yfir­tökur þó ekki endi­lega bundnar við ein­stak­lings­við­skipti. „Þetta gæti verið þvert á svið, en það er al­farið fræði­legt. Þetta er frekar yfir­lýsing um að við séum með góða stöðu á Norður­löndum. Við myndum fjár­magn, erum með góða af­komu og innri vöxt. En við höfum líka mögu­leika á að vaxa með yfir­tökum og við munum gera það ef eitt­hvað áhuga­vert kemur upp,“ segir hann. Horfa einungis til Norðurlandanna Nor­dea hefur verið virkari í yfir­tökum undan­farin ár en Danske Bank. Vang-Jen­sen segir stefnu bankans vera að vaxa á heima­mörkuðum sínum fjórum á Norður­löndum. Aðaláherslan sé á innri vöxt, en bankinn skoði jafn­framt eignir sem gætu styrkt stöðu hans. „Við erum ein­göngu með norrænan fókus. Innan Norður­landa eru ýmis fyrir­tæki sem við gætum auð­veld­lega séð fyrir okkur innan Nor­dea-fjöl­skyldunnar. Það gætu verið fyrir­tæki sem veita okkur betri land­fræði­lega út­breiðslu eða að­gang að vörum sem við höfum ekki í dag,“ segir Vang-Jen­sen. Hann segir Nor­dea vinna mark­visst að því að meta hvaða eignir gætu verið áhuga­verðar. Skil­yrðið sé þó að þær fáist á verði sem bankinn telji aðlaðandi. Nor­dea keypti árið 2023 norska ein­stak­lings­við­skipta­arm Danske Bank, sem náði til um 235 þúsund við­skipta­vina. Sam­kvæmt Børsen hafði Nor­dea einnig áhuga á sænskum ein­stak­lings­við­skiptum Danske Bank á þeim tíma, en Danske Bank vildi ekki selja þau. Nor­dea keypti einnig sænska fjártækni­fyrir­tækið Advinans árið 2024, en félagið hafði þróað stafrænan líf­eyris­vett­vang. Árið 2022 keypti Nor­dea líf­eyris­starf­semi Top­dan­mark fyrir um 2,1 milljarð danskra króna. Þar áður keypti bankinn norska fjár­mögnunar­fyrir­tækið SG Finans af Société Généra­le og Gj­ensidi­ge Bank í Noregi. Danske Bank hefur hins vegar ekki farið í stóra yfir­töku frá því bankinn keypti SEB Pension í Dan­mörku árið 2018. Henta ís­lenskir bankar? Í frétt Børsen er ekki minnst á Ís­land eða ís­lenska banka. Um­mæli for­stjóranna vísa fyrst og fremst til norrænna heima­markaða bankanna og í til­viki Danske Bank er Svíþjóð sér­stak­lega nefnd. Það má þó lesa úr um­mælum Vang-Jen­sen að Nor­dea horfi til eigna sem annaðhvort styrkja land­fræði­lega stöðu bankans eða bæta við vöru­fram­boð. Slík lýsing úti­lokar ekki ís­lenskar eignir í orði kveðnu, enda er Ís­land hluti af norræna svæðinu. En ekkert í frétt Børsen bendir sér­stak­lega til þess að ís­lenskir bankar séu til skoðunar. Þvert á móti virðist áherslan vera á markaði þar sem bankarnir eru þegar með starf­semi eða þar sem þeir telja sig geta styrkt veika stöðu, ekki síst í Svíþjóð. Nor­dea og Danske Bank horfa jafn­framt til eigna sem eru til­tækar á aðlaðandi verði. Þar skiptir máli að ís­lensku bankarnir eru skráð félög, með sterka eigin­fjár­stöðu og til­tölu­lega hátt verðmat í norrænum saman­burði, auk þess sem reglu­verk og stærð markaðarins gera yfir­tökur ekki sjálf­gefnar. Ummæli forstjóranna sýnir þó að stórir norrænir bankar séu aftur komnir í yfir­töku­hug­leiðingar en að bein merki séu um áhuga á ís­lensku bönkunum. Þau styðja þá mynd að samþjöppun á norrænum banka­markaði gæti færst í aukana ef eig­endur eru til­búnir að selja og verðið þykir rétt. Hér á landi hafa bankarnir einnig horft til vaxtar með sam­runa eða kaupum innan­lands, meðal annars í ljósi þungs reglu­verks, hárrar eigin­fjár­bindingar og aukinnar sam­keppni frá er­lendum fjártækni­fyrir­tækjum og bönkum. Þær hug­myndir hafa þó ekki gengið eftir, meðal annars vegna af­stöðu Sam­keppnis­eftir­litsins og þess hversu samþjappaður ís­lenski banka­markaðurinn er.