Þegar Íranir og Bandaríkjamenn voru að nálgast samkomulag um að binda enda á átök sín í þessari viku voru ekki allir í Íran sáttir við þá þróun. New York Times fjallar um andstöðuna í dag. Harðlínumenn, lítill en hávær hópur með fulltrúa á íranska þinginu og sæti í Æðsta þjóðaröryggisráðinu, hafa opinberlega lagst gegn hvers kyns tilslökunum gagnvart Bandaríkjamönnum. Þeir hafa notað mótmælafundi, ríkisfjölmiðla og yfirlýsingar til að reyna að koma í veg fyrir að samningur náist. Sjá einnig Trump við að taka endanlega ákvörðun Enn er óljóst hvort og hvenær samkomulag verður tilkynnt. Donald Trump forseti fundaði í tvær klukkustundir með ráðherrum sínum í Aðgerðarherberginu í Hvíta húsinu í gær, en frestaði því að taka endanlega ákvörðun samkvæmt háttsettum embættismanni. Aðalsamningamaður Írans, Mohammad Bagher Ghalibaf hershöfðingi, sagði í færslu á samfélagsmiðlum fyrr um daginn að Íranir treysti ekki ráðamönnum Washington og að ekkert skref yrði stigið „fyrr en hinn aðilinn hefur gert sitt fyrst“. En innan Írans halda pólitísk átök áfram. Íranska ríkissjónvarpið, sem er undir stjórn harðlínumanns, hefur ýtt undir ágreininginn í landinu og lýst samningaviðræðunum sem misheppnuðum. Á mánudag ávítaði Masoud Pezeshkian forseti ríkissjónvarpið á fundi með yfirmönnum þess og hvatti þá til að hætta að sundra þjóðinni. Sjá einnig Olíu­verð stefnir í mestu mánaðar­lækkun frá 2020 Pezeshkian sagði að jafnvel Ali Khamenei, fyrrverandi æðsti leiðtoginn sem var drepinn á fyrsta degi stríðsins, hefði „samþykkt að við yrðum að setjast að samningaborðinu“. „En núna,“ hélt hann áfram, „erum við að boða að við eigum ekki að semja.“ Á fjölmennum útifundi harðlínumanna í Teheran á föstudag veifuðu stórir hópar fána og kölluðu eftir staðfestu. Fréttamaður ríkissjónvarps spurði nokkra þátttakendur hvort Íran ætti að hörfa eða halda áfram átökum við Bandaríkin og Ísrael. „Við viljum að þeir refsi þeim almennilega,“ sagði ein kona á fundinum. „Standið fastir, við erum með ykkur þar til síðasti blóðdropinn fellur,“ sagði einn karlmaður. „Trump verður að skilja að Íran, sem sigurvegari og ráðandi afl á vígvellinum, setur skilmálana,“ skrifaði Ebrahim Azizi, íhaldssamur þingmaður og formaður þingnefnda um þjóðaröryggi og utanríkismál, á samfélagsmiðlum á föstudag. Stjórnmálaskýrendur sem standa ríkisstjórninni nærri segja að harðlínumenn endurspegli skoðanir minnihluta, bæði meðal almennings og embættismanna. Samt sem áður geti verið hættulegt að hundsa þá, þar sem það gæti útilokað þann hluta þjóðarinnar sem hefur verið meðal tryggustu stuðningsmanna Íslamska lýðveldisins í gegnum pólitískar og samfélagslegar sviptingar. „Þessi fylking talar ekki fyrir hönd meirihluta Írana og hefur verið ýtt til hliðar frá lykilákvörðunum. Kjarnorkuviðræðurnar halda áfram þrátt fyrir andstöðu þeirra,“ sagði Mehdi Rahmati, stjórnmálaskýrandi í Teheran, í símaviðtali við blaðið. Jafnvel nýr æðsti leiðtogi Írans, Mojtaba Khamenei, sonur hins látna fyrrverandi leiðtoga, er ekki undanþeginn gagnrýni þeirra. Á fimmtudag gerði Hamid Rasaee, harðlínuprestur og þingmaður, gys að Khamenei í færslu á samfélagsmiðlum undir fyrirsögninni: „Hver er verðugur æðstu leiðtogastöðunni?“ Mojtaba Khamenei, sem hefur verið í felum frá því stríðið hófst seint í febrúar, hefur lýst yfir stuðningi við kjarnorkusamningateymið í skriflegum yfirlýsingum.