Jón Helgi Egilsson, doktor í hagfræði og fyrrverandi formaður bankaráðs Seðlabankans, gagnrýnir framsetningu fjármálaráðuneytisins á niðurstöðum skýrslu sérfræðingahóps um valkosti Íslands í gjaldmiðlamálum. Í aðsendri grein í Morgunblaðinu segir hann að höfundar skýrslunnar segi ekki að kostnaður við krónuna sé meiri en ábatinn. „Ef höfundar evruskýrslunnar segja sjálfir að þeir hafi ekki metið mikilvæga þætti sem tengjast raunhagkerfi og vinnumarkaði, og hvergi í 219 blaðsíðna skýrslunni er fullyrt að kostnaður krónunnar sé meiri en ábatinn, á hverju byggir þá Stjórnarráð Íslands þá fullyrðingu að það sé niðurstaða skýrslunnar?“ spyr Jón Helgi. „Það er spurning sem stjórnvöld skulda kjósendum svar við.“ Fjármálaráðuneytið birti téða skýrslu á föstudaginn í tilkynningu undir fyrirsögninni „Kostnaður af krónu líklega meiri en ábatinn“. Þar segir ráðuneytið að helstu niðurstöður skýrslunnar séu að kostnaðurinn við íslensku krónuna sé verulegur og líklega að jafnaði meiri en sá ábati sem fylgir sjálfstæðum gjaldmiðli. Jón Helgi segir að það komi ekki á óvart að RÚV og aðrir fjölmiðlar hafi miðlað sömu niðurstöðu til almennings enda treysti fréttastofur eðlilega á að stjórnvöld lýsi eigin skýrslum af nákvæmni. Hann segir að niðurstaða hin meinta helsta niðurstaða skýrslunnar, um að kostnaður við að halda úti íslensku krónunni sé líklega meiri en ábatinn, fáist ekki nema helstu kostnaðar- og ábataþættir hafi verið metnir. „Þess vegna hóf ég lesturinn á einfaldri spurningu: Hvar í evruskýrslunni er sú greining? Eftir að hafa lesið evruskýrsluna frá upphafi til enda hefur mér ekki tekist að finna að höfundar hennar komist að þeirri niðurstöðu sem Stjórnarráð Íslands segir að þeir hafi komist að. Mér hefur heldur ekki tekist að finna að þeim hafi verið falið það verkefni sem fréttatilkynningin lýsir. Þá hef ég ekki fundið þá niðurstöðu í skýrslunni að eina leiðin til að taka upp evru sé að ganga í Evrópusambandið. Raunar er fjallað um fleiri leiðir.“ Jón Helgi bendir á að höfundar skýrslunnar segi hins vegar að þeir hafi ekki metið mikilvæga þætti sem tengjast raunhagkerfi og vinnumarkaði og því ekki greint allan fórnarkostnaðinn við upptöku evru. Hann furðar sig á málflutningi Daða Más Kristóferssonar fjármálaráðherra um að innganga í ESB sé eina leiðin til að taka upp evru. „Sú fullyrðing stenst augljóslega ekki. Andorra, Mónakó, San Marínó, Kosóvó, Svartfjallaland og Vatíkanið nota evru án þess að vera aðilar að Evrópusambandinu.“ Fjallað verður um efni skýrslunnar á opinni ráðstefnu í Hörpu þann 2. júní næstkomandi.