Nú er ljóst að gengið verður til þjóðaratkvæðagreiðslu í ágúst um hvort íslensk stjórnvöld eigi að hefja samningaviðræður við Evrópusambandið um aðild. Týr bendir á að Íslendingar hafi nú þegar full yfirráð yfir auðlindum sínum og telur því hálfgerða erindisleysu að senda Þorgerði Katrínu Gunnarsdóttur til Brussel til samningaviðræðna um slíkt. *** Framganga Þorgerðar Katrínar hefur vakið töluverða athygli að undanförnu. Þannig sakaði hún andstæðinga aðildar að Evrópusambandinu hér á landi um að stunda hræðsluáróður í anda talsmanna Brexit á sínum tíma í viðtali við breska blaðið The Guardian. Gott ef hún lýsti ekki einnig yfir áhyggjum af því að andstæðingar aðildar væru handbendi áróðursvéla rússneskra stjórnvalda. Tý þykir þessi málflutningur ekki vera á háu plani. Þetta eru kaldar kveðjur til að minnsta kosti helmings kjósenda. Íslendingar hafa rætt um rök með aðild og gegn henni um áratugaskeið og eru kjósendur full­færir um að mynda sér skoðun á ávinningi hennar án þess að leita í smiðju Nigels Farage eða Vladimírs Pútíns eftir innblæstri. *** Annars ættu menn að líta sér nær þegar kemur að upplýsingaóreiðu og hræðsluáróðri í tengslum við atkvæðagreiðsluna í ágúst. Í síðustu viku kynnti Daði Már Kristófersson fjármálaráðherra skýrslu nokkurra erlendra sérfræðinga um upptöku evru hérlendis. Í frétt á vef fjármálaráðuneytisins um skýrsluna segir að niðurstaða hennar sé að kostnaðurinn við krónuna og sjálfstæða peningamálastefnu sé meiri en ábatinn. Jón Helgi Egilsson, doktor í hagfræði, benti á í framhaldinu að þessi túlkun ráðuneytisins væri beinlínis röng og að hvergi í skýrslunni færi fram kostnaðar- og ábatagreining þar sem kostir og gallar krónunnar og evrunnar væru vegnir saman. Jón Helgi bendir á að þvert á móti hafi höfundar bent á að upptaka evru hefði kostnað í för með sér, auk þess sem Ísland myndi missa þann sveigjanleika sem fælist í sjálfstæðri peningastefnu. Í því samhengi er rétt að halda til haga að Hilde Bjørnland, einn skýrsluhöfunda, hefur talað gegn því að Norðmenn taki upp evru enda henti sameiginleg mynt Evrópusambandsins ekki auðlindadrifnum hagkerfum. Týr er einn af föstum ritstjórnardálkum Viðskiptablaðsins. Þessi pistill birtist fyrst í blaðinu sem kom út 3. júní 2026.