Fyrrverandi aðalhagfræðingur Alþjóðagjaldeyrissjóðsins (AGS), Ken Rogoff, telur líklegra en ekki að skuldakreppa muni ríða yfir Bretland fyrir lok áratugarins. The Telegraph greinir frá. Rogoff sagði að nokkur stór áföll á undanförnum árum, þar á meðal Covid-faraldurinn, innrás Rússa í Úkraínu og stríðið í Íran, hafi leitt til þess að nú séu „meiri en 50:50 líkur“ á skuldakreppu í Bretlandi fyrir árið 2030 sem myndi neyða ríkið til að ráðast í umfangsmiklar skattahækkanir eða verulegan niðurskurð. Hann bætti við að ef nýleg áföll verða til þess að Englandsbanki, seðlabanki Bretlands, missi tök á verðbólgu, þá gæti Bretland jafnvel þurft á stærri björgunarpakka að halda með stuðningi frá AGS, sem gegnir hlutverki lánveitanda til þrautavara. „Í slíkum aðstæðum yrði kallað í AGS til að veita tæknilega aðstoð,“ sagði Rogoff, sem starfar í dag sem prófessor við Harvard-háskólann. Sir Charlie Bean, fyrrverandi varaseðlabankastjóri peningastefnu við Englandsbanka og fyrrum stjórnandi við sjálfstæðu fjárlagastofnunina OBR, hefur jafnframt varað við að raunveruleg hætta sé á mögulegu inngripi frá AGS. Í umfjölluninni er bent á að skuldir hins opinbera í Bretlandi stefni í að verða yfir 3 þúsund milljarðar punda í september næstkomandi. Skuldahlutfall Bretlands nálgast 100% af vergri landsframleiðslu. Rachel Reeves, fjármálaráðherra Bretlands, hefur aukið skuldir umtalsvert frá því að ríkisstjórn Verkamannaflokksins tók til valda sumarið 2024. Í fyrstu fjárlögum hennar voru ríkisútgjöld aukin um 70 milljarða dala, en þar af var aðeins helmingur fjármagnaður með aukinni skattheimtu.