Loðnu­vinnslan á Fáskrúðs­firði hafnar því að félagið hafi í veru­legum mæli fjár­fest í rekstri sem sé ótengdur sjávarút­vegi. Félagið hefur sent frá sér áréttingu vegna ný­legrar skýrslu Hag­fræði­stofnunar um eignar­hald í sjávarút­vegi. Þar kemur fram, að sögn Loðnu­vinnslunnar, að félagið, dóttur­fyrir­tæki þess og eig­endur hafi á árunum 2014 til 2024 fjár­fest í rekstri öðrum en út­gerð fyrir 5.301 milljón króna. Loðnu­vinnslan segir þessa fram­setningu gefa ranga mynd af fjár­festingum félagsins. „Loðnu­vinnslan telur rétt að árétta að félagið, dóttur­fyrir­tæki þess og stærsti eig­andi, Kaup­félag Fáskrúðs­firðinga, hafa fyrst og fremst ein­beitt sér að fjár­festingum innan sjávarút­vegs og tengdri starf­semi,“ segir í áréttingu félagsins. Að sögn Loðnu­vinnslunnar snúa fjár­hæðirnar sem vísað er til í skýrslunni nánast al­farið að fjár­festingum hlut­hafa í félaginu sem fer með 1,67% hlut. Þær fjár­festingar hafi numið um 5.091 milljón króna á tíma­bilinu. „Fjár­festingar þessara aðila á tíma­bilinu upp á um 5.091 milljón króna eru Loðnu­vinnslunni og rekstri hennar al­gjör­lega óviðkomandi,“ segir í áréttingunni. Félagið segir eigin fjár­festingar í verk­efnum sem séu ótengd sjávarút­vegi vera fáar og óveru­legar. „Þar er fyrst og fremst um að ræða sam­félags­leg verk­efni sem snúa að nýsköpun og stuðningi við upp­byggingu í þeim lands­fjórðungi sem fyrir­tækið starfar í,“ segir í yfir­lýsingunni. Undir áréttinguna skrifar Garðar Svavars­son, fram­kvæmda­stjóri Loðnu­vinnslunnar. Loðnu­vinnslan er eitt stærsta fyrir­tækið á Fáskrúðs­firði og er stærsti hlut­hafi félagsins Kaup­félag Fáskrúðs­firðinga með 83,26% hlut. Aðrir stærstu hlut­hafar í árs­lok 2025 voru Lífs­verk líf­eyris­sjóður með 5,57% hlut og Sjóvá-Al­mennar tryggingar með 3,64% hlut. Hlut­hafinn sem Loðnu­vinnslan vísar til í áréttingunni er Olympus hf., sem fer með 1,67% hlut í félaginu. Félagið er skráð í Hafnarfirði og er forráðamaður þess Guð­munda Þórunn Gísla­dóttir. Sam­kvæmt skráningu er starf­semi félagsins flokkuð sem frysting fiska­furða, krabba­dýra og lindýra.