Viðskiptaráð Íslands hefur birt úttekt á efnahagslegum áhrifum þingmála ríkisstjórnarinnar á nýliðnum þingvetri. Niðurstaðan sýnir að áhrif hafi verið neikvæð að meðaltali, en samanlögð einkunn þeirra 52 mála sem talin voru hafa markverð efnahagsleg áhrif var mínus sjö stig. Af þeim 141 þingmálum sem ríkisstjórnin lagði fram voru 112 samþykkt á nýafstöðnum þingvetri og telur Viðskiptaráð að 52 hafi haft markverð áhrif á efnahagslífið. Helmingur þeirra var metinn jákvæður og helmingur neikvæður. Málunum er gefin einkunn frá 1 til 3 eftir umfangi áhrifanna. Þingmál fjármálaráðuneytisins, sem Daði Már Kristófersson fer fyrir, voru metin með neikvæðustu efnahagsáhrifin og hlutu lægstu heildareinkunnina. Á hinn bóginn voru þingmál umhverfis-, orku- og loftslagsráðuneytisins og dómsmálaráðuneytisins, sem Jóhann Páll Jóhannsson fer fyrir, metin með jákvæðustu áhrifin af öllum ráðuneytum. Lagabreyting um tengingu bóta við launavísitölu var eina málið sem fékk lægstu mögulegu einkunn í mati Viðskiptaráðs. Meðal annarra mála sem fengu miðlungs neikvæða einkunn voru hækkun stofnframlaga ríkisins til óhagnaðardrifinna leigufélaga, takmarkanir á breytingum leigufjárhæða, skráningarskylda leigusamninga og innleiðing kílómetragjalds. Þrjú mál stóðu upp úr sem þau sem höfðu jákvæðust áhrif að mati ráðsins. Þar er annars vegar um að ræða afnám jafnlaunavottunar, einföldun ferla á sviði orkumála og sameiningu Skipulagsstofnunar og Húsnæðis- og mannvirkjastofnunar. Mynd tekin af vef Viðskiptaráðs. Í úttektinni hvetur Viðskiptaráð ríkisstjórnina til að leggja aftur fram þau mál sem ekki náðu fram að ganga en hefðu haft jákvæð áhrif á atvinnulíf og efnahag. Þar nefnir ráðið sérstaklega frumvarp fjármála- og efnahagsráðherra um afnám áminningarskyldu opinberra starfsmanna og frumvarp um breytingar á tekjuskatti og staðgreiðslu sem ætlað er að auðvelda erlendar fjárfestingar.