„Það er alltaf talað um að auka peninga í hafrannsóknir og styrkja þær og auðvitað eigum við að styrkja þær en lífið snýst ekki allt um peninga. Þetta snýst líka um hvernig á að nota peninga. Þar á ég við; erum við að nota rétt módel?“ segir Gunnþór Ingvason, forstjóri Síldarvinnslunnar og formaður Samtaka fyrirtækja í sjávarútvegi. Mögulega þurfi að greina stöðuna betur Rætt var við Gunnþór í Fiskifréttum í síðustu viku um nýja veiðiráðgjöf Hafrannsóknastofnunar. Sagði hann þá meðal annars það vera gríðarleg vonbrigði að ekki væri farinn að sjást vöxtur í þorskstofninum. Mögulega þyrfti að greina stöðuna betur. Nýti gögnin með vísindunum „Útgerðin á náttúrlega gríðarlega mikið af gögnum ef við getum sameinast um nýtingu á þeim með vísindasamfélaginu,“ segir Gunnþór. Spurningin sé hvort stuðst sé við rétt líkön í öllum stofnum. „Er búið að heimfæra módel af einum stofni á annan kannski með full einföldum hætti? Ég kann þetta ekki en tel að þetta sé eitt af því sem við þurfum einfaldlega að fara ofan í.“ Telji komin betri gögn og kerfi Gunnþór nefnir einnig karfastofnana. „Ég er svo sem ekki fiskifræðingur en það eru menn sem telja að það séu komin betri gögn og kerfi til að vinna úr gögnunum og að endurskoða þurfi þessi gagnamódel og hvernig unnið með þau,“ segir hann. Þetta eigi raunar við í öllum veiðistofnum. Vilja sjá plúsa í þorskstofninum eftir öll þessi ár „Auðvitað er ekki ásættanlegt að sjá ekki þorskinn í þessari veiði ár eftir ár og alltaf á leið niður og vera föst einhvers staðar neðarlega í þorskveiðinni. Við hljótum að vera farin að vilja sjá einhverja plúsa í þorskstofninum eftir öll þessi ár,“ undirstrikar Gunnar. Spurður hvort hann telji þá að ráðgjöf Hafrannsóknastofnunar sé of varfærnisleg segist Gunnþór ekki vera að segja það. Séu stöðugt á tánum „Það þarf bara að endurskoða módelin og aðferðafræðina sem við erum að nota. Það er eins og annað í lífinu, maður þarf stöðugt að vera á tánum gagnvart því að maður sé að nota bestu gögn, bestu aðferðafræði og bestu vinnubrögð á hverjum tíma,“ segir Gunnþór. Hann kveðst ekki vita hvað komið gæti út úr slíkri vinnu. Ættu kannski bara að líta í eigin barm „En við þurfum að vera skapandi í að endurskoða vinnubrögðin og hvort við erum með bestu aðferðafræðina. Hvaða rannsóknir við þurfum að bæta í og bæta við. Hvort við getum unnið meira með okkar eigin gögn. Samstarfið við Hafró hefur í gegnum tíðina verið gott í flestum stofnum. En það er ekki þar með sagt að það megi ekki bæta það og útgerðin þarf kannski bara að líta í eigin barm varðandi hvað hún getur lagt meira af mörkum í þessu,“ segir Gunnþór. Þurfi að líða betur með þetta Rannsóknarskipið Árni Friðriksson. Mynd/Einar Ásgeirsson Eins og Gunnþór vék að hér á undan búa útgerðirnar yfir gríðarlega miklu af gögnum og búnaði í fiskiskipunum. Spurningin er hvort þær þurfa að fá eitthvað meira í skipin til að safna frekari gögnum. „Þetta snýst um að það sé öruggt að við séum að byggja ráðgjöf og nýtingu á þessum auðlindum okkar á sem bestum fyrirliggjandi gögnum, aðferðafræði og vinnubrögðum hverju sinni. Við þurfum bara að styrkja þessa þætti því okkur þarf að líða aðeins betur með þetta,“ segir Gunnþór Ingvason.