Takmarkanir hafa verið settar á vindorkunýtingu með nýrri löggjöf. Í dag eru tveir vindorkukostir í nýtingarflokki rammaáætlunar, Vaðölduver og Blöndulundur, sem báðir eru á hendi Landsvirkjunar. Uppbygging vindorku hér á landi hefur víða mætt andstöðu á undanförnum árum. Hörður Arnarson, forstjóri Landsvirkjunar, telur að ein ástæða þess hafi verið að fólk hafi upplifað að fyrirhuguð uppbygging væri stjórnlaus, þegar tugir vindorkukosta voru kynntir og gefið til kynna að þeir gætu allir orðið að veruleika á skömmum tíma. Það hafi ekki verið rétt, enda kostirnir flestir á byrjunarreit og langt samráðs- og leyfisveitingaferli eftir. „Ég held að orkugeirinn hefði getað gert miklu betur í því að byggja upp traust almennings á ferlið. Við þurfum að horfa fram á við því við sjáum að önnur lönd hafa lent í miklum vandræðum þegar almenningur upplifir að það sé einhver óstjórn. En ég held að löggjöfin tryggi að það á að vera hægt að stýra þessari uppbyggingu vel,“ segir Hörður. „Ég hef trú á því að ef við gerum þetta rétt, höldum okkur við stefnu stjórnvalda um að vera bara á ákveðnum stöðum, á þegar röskuðum svæðum nálægt innviðum, þá náist sátt um vindorkuna. Við verðum líka að gera okkur grein fyrir að við erum að gera þetta því við þurfum þessa orku. Ef við viljum góð lífskjör og við viljum nota minna af olíu, þá er engin önnur leið. En það þarf að vanda sig.“ Frumvarp umhverfis-, orku- og loftslagsráðherra felur meðal annars í sér að vindorkunýting verði útilokuð á svæðum sem hafa verið friðlýst eða njóta sérstakrar verndar, fallið er frá hugmyndum fyrri ára um flýtimeðferð vindorkugarða fram hjá rammaáætlun, áhrifavald nærsamfélags er hámarkað með því að gera formlega afstöðu sveitarfélaga að grundvallarbreytu við mat á vindorkukostum, og horft verður sérstaklega til áhrifa á fuglalíf og óbyggð víðerni, en jafnframt hvort vindorkukostur sé til þess fallinn að styðja við atvinnu- og byggðaþróun á viðkvæmum svæðum og uppbyggingu raforkuflutningskerfisins Í dag eru tveir virkjunarkostir í nýtingarflokki rammaáætlunar, báðir voru samþykktir af Alþingi við afgreiðslu þriðja áfanga árið 2022. Verkefnisstjórn 5. áfanga rammaáætlunar lagði síðan fram tillögu í lok árs 2024 um flokkun 10 vindorkuverkefna í biðflokk. Ráðherra lagði aftur á móti til við verkefnisstjórn rammaáætlunar í fyrra að vindorkukosturinn Garpsdalur yrði settur í orkunýtingarflokk rammaáætlunar. Þá hefur meirihluti sveitarstjórnar Norðurþings óskað eftir því við verkefnisstjórn rammaáætlunar að vindorkuvirkjunarkosturinn Hnotasteinn yrði endurmetinn og færður í nýtingarflokk. Nánar er fjallað um málið í Viðskiptablaðinu . Áskrifendur geta lesið fréttina í heild hér .