Breytingar á lögum um verndar- og orkunýtingaráætlun, sem sneru að takmörkun á vindorkunýtingu, voru samþykktar rétt fyrir þinglok í síðustu viku. Landsvirkjunin er eina fyrirtækið með vindorkukosti í nýtingarflokki og standa framkvæmdir nú yfir við annan þeirra, Vaðölduver. Takmarkanir eru á hversu mikið er hægt að byggja upp af vindorku hér á landi, þar sem nauðsynlegt er að hafa jöfnunarorku til staðar til að jafna sveiflur í framleiðslu. Landsvirkjun er eini orkuframleiðandinn sem býr yfir jöfnunarorku eins og er. Spurður hvort að það þýði að Landsvirkjun muni leiða uppbyggingu í vindorku segir Hörður Arnarson, forstjóri Landsvirkjunar, að fyrirtækið taki þátt í henni en fagni einnig aðkomu annarra. „Við fögnum því, alveg eins og við fögnum því að aðrir komi inn í vatnsafl og jarðvarma, og við munum gera allt sem í okkar valdi stendur til þess að styðja þá eins og kerfið leyfir. En það er mikilvægt líka að árétta það að þessi jöfnunargeta er ekki auðlind sem Landsvirkjun hefur fengið úthlutað, þetta eru dýrar fjárfestingar sem fyrirtækið hefur ráðist í með því að búa til umfram vinnslugetu í virkjununum,“ segir Hörður. Takmörkuð umframgeta sé í kerfinu, eða í kringum 200 MW, og hefur ítrekað verið bent á aflskort. Landsvirkjun hefur unnið að því að bæta þar úr, meðal annars með byggingu Búrfellsstöðvar 2 og með fyrirhugaðri stækkun Sigölduvirkjunar, sem er fjárfesting upp á meira en 25 milljarða króna. Með stækkuninni eykst afl virkjunarinnar um 60 MW en hún bætir engri orku við. „Við hjá Landsvirkjun ætlum að halda uppbyggingunni áfram, bæði til að styðja okkar vindorkuframleiðslu en líka til að styðja aðra,“ segir Hörður. Hann bindur vonir við að aðrir orkuframleiðendur sjái sér hag í að taka þátt í uppbyggingunni. ,,Það er dýrt að byggja upp og viðhalda slíkri umframgetu og því væri kostur ef fleiri orkufyrirtæki ynnu að því að bæta stýranlegu afli við kerfið.“ Landsvirkjun hafi unnið að því að þróa vöru til þess að jafna vind. Staðan sé hins vegar sú að það eru engin verkefni komin á þann stað í rammáætlunarferlinu að slíkrar vöru eða þjónustu sé óskað, enda sé það ekki skilyrði. Vindorkan góður þriðji kostur Auk Vaðölduvers er Landsvirkjun með vindorkukostinn Blöndulund á Norðurlandi í nýtingarflokki. Forhönnun stendur nú yfir en þar veltur uppbygging á flutningskerfinu, þar sem áform Landsnets um Blöndulínu 3 þurfa að ganga eftir. Þar fyrir utan hefur Landsvirkjun aðra vindorkukosti til skoðunar, þar á meðal nálægt Kárahnjúkavirkjun og Þeistareykjastöð. Hvað aðra virkjunarkosti Landsvirkjunar varðar, þá eru Holtavirkjun og Skrokkölduvirkjun á Suðurlandi í nýtingarflokki og á Norðurlandi er möguleiki á stækkun Þeistareykjarstöðvar, Kröflustöðvar og Bjarnaflagsvirkjun. Að sögn Harðar eru vatnsafl og jarðvarmi bestu og hagkvæmustu kostirnir en vindorkan sé góður þriðji kostur. „Við eigum takmarkað magn af vatnsafli og jarðvarma. Við gætum kannski sleppt því að nýta vindorkuna í nokkur ár og valið bara vatnsafl og jarðvarma, en ef við horfum lengra fram í tímann þá er alveg öruggt að vindorkan verður sterkur hluti,“ segir Hörður. Nánar er fjallað um málið í Viðskiptablaðinu . Áskrifendur geta lesið fréttina í heild hér .